MADRID, 20 d'Ochobre (MADRID)
El expresidente de Caja Madrid Miguel Blesa intentó que l'aseguradora de Caja Madrid, Mapfre, cubra la fianza de 16 millones d'euros en conceptu de responsabilidá civil pol usu de les 'tarxetes B' opaques al fiscu que-y impunxo'l pasáu xueves el xuez de l'Audiencia Nacional Fernando Andreu, informaron fontes xurídiques.
El banqueru presentó un escritu'l pasáu vienres formalizando esta socilitud y reclamando al Xulgáu Central d'Instrucción númberu 4 que se dirixera a l'aseguradora pa formalizar el pagu de la millonaria cantidá.
El xuez Andreu refugó nuna providencia fecha pública esti llunes el so pidimientu. El maxistráu confirma que Blesa dispon d'un plazu qu'acaba'l próximu miércoles pa facer efectiva la fianza y recuerda que, nel casu de que'l dineru nun se deposite, va proceder al embargu de los sos bienes.
Fontes cercanes al expresidente de la caxa madrilana adelantaron la pasada selmana que Blesa nun va poder facer frente a la fianza y va asumir, poro, l'embargu del so patrimoniu. Precisaron que nun tien capacidá económica abondo pa encarar l'abonu. Blesa sí que pudo atender nel plazu de 24 hores una fianza de 2,5 millones d'euros que-y impunxo'l xuez Elpidio José Silva pa refugar el so ingresu en prisión en mayu del 2013.
Amás, el banqueru tien previsto recurrir en cinco díes la fianza acordada pol xuez Andreu, anque la presentación d'esti escritu nun paraliza'l plazu del que dispón pa facer efectiva la caución, que vence'l próximu miércoles.
