WASHINGTON, 17 Nov. (Reuters/EP) -
La Cámara de Representantes d'EEUU aprobó esti xueves el fuerte paquete de retayos d'impuestos propuestu pol presidente norteamericanu, Donald Trump, que afecta tanto a empreses como a trabayadores.
Con 227 votos a favor y 205 votos en contra, la Cámara Baxa permitió treslladar el debate al Senáu, que va ratificar el proyectu nes selmanes próximes. Un total de 13 republicanos votaron en contra de la llexislación.
Trátase de la primera victoria llexislativa grande de Trump desque asumió'l cargu en xineru. El magnate encamentó a los republicanos a apoyar la midida impositiva primero qu'empezara la votación, una midida que los demócrates calificaron de "un regalu pa los ricos y les empreses".
El proyectu de llei, que se valora que va provocar una medría de la delda nacional en cuasi 1,5 billones de dólares (1,2 billones d'euros) de cara a los diez años próximos, va amenorgar de siete a cuatro los tramos impositivos y rebaxaría l'Impuestu de Sociedaes del actual 35 por cientu al 20 por cientu.
"Aprobar esti proyectu de llei ye lo más importante que podemos facer pa que medre la economía, restaurar les oportunidaes y ayudar a estes families de clase media que lluchen", señaló'l presidente de la Cámara, Paul Ryan, enantes de la votación.
El Congresu nun revisó dafechu l'estensu códigu impositivu de los Estaos Uníos desque'l republicanu Ronald Reagan foi presidente. La midida de la Cámara de Representantes nun ye tan minuciosa como'l paquete radical de Reagan de 1986, pero sí ye más ambiciosa que'l restu.
