UVIÉU, 22 de Xunu (EUROPA PRESS)
Los pasos de peatones de Cangas tán decoraos con sentencies populares y cites lliteraries en llingua asturiana, escoyíes polos alumnos de los centros educativos del conceyu.
Trátase de la última actividá de la Sumana de Les L.lletres del conceyu cangués, acabante de celebrase. El resultáu d'esta iniciativa, desarrollada baxo'l nome 'Pisando sobre los nuesos raizones l.lliterarios', presentóse esti martes.
Los alumnos escoyeron dende dichos populares como 'Nun pases alloriáu', a cites d'autores asturianos, como '¡Ai! La lluna ye un suañu... Un suañu redondu pero un suañu al fin', estrayida del llibru de Miguel Rojo '¿De qué tará fecha la lluna?', pasando per cites de clásicos de la lliteratura universal, como 'El Principín' (la versión n'asturianu de 'El Principito', tornada por Xosé Lluis García Arias): 'Si, por exemplu, vienes a les cuatro, yá taría contenta a les trés'.