MADRID, 15 Sep. (EUROPA PRESS) -
Casi 5.000 persones xuntáronse yá a la campaña que reclama al Conceyu de Madrid que'l roqueru Rosendo Mercado tenga una estatua nel so barriu de Carabanchel, en Madrid.
Rosendo va actuar el próximu 27 de setiembre na plaza de toros de Las Ventas (yá coles 17.000 entraes escoses) pa celebrar les sos 30 años de trayectoria en solitariu, a los qu'hai que sumar prácticamente otros 10 más con Leño, Ñu y otres formaciones anteriores.
Con esta escusa, el programa de Radio 3 'Hoy empieza todo' punxo en marcha una campaña de firmes n'internet al traviés del sitio web Change.org, pa que Rosendo tenga una estatua nel so barriu natal de Carabanchel, nel sur de Madrid.
"Rosendo fíxote feliz cientos de vegaes. Ye la hora de ser agradecíu. Esti 2014, Rosendo Mercado cumplió 60 años. D'ellos, más de 40 pegáu a una guitarra. 'Maneras de vivir', 'Este Madrid', 'Pan de higo', 'Agradecido'... cierra los güeyos ya imaxínalo. La imaxe llega darréu. La so figura ye l'iconu del rock n'España", plantega'l testu del pidimientu, recoyíu per Europa Press.
Nesta llinia, los firmantes sofiten que "Carabanchel foi y ye'l so barriu". "El barriu de San Isidro Labrador, onde taba allugada la quinta del sordu de Goya, onde taba'l llar d'Antonio Buero Vallejo. El barriu de Manolito Gafotas, el de la Puerta Bonita y (a partir d'esta propuesta y gracies a la to ayuda) el de la estatua dedicada a Rosendo Mercado. Ye'l momentu de dexar xuníos a Rosendo y Carabanchel pa siempres", prosigue'l testu.
"El tiempu va pasar, pero la hestoria tien qu'ayudar a recordar a un músicu que dende una posición humilde, abrióse pasu a canilada llimpia colos mordigaños musicales de Leño. Rosendo canta a tolos barrios d'España. De magar, tresformóse nun adalid del verbu apurriendo una riqueza al vocabulariu del rock que fai que'l so llinguaxe seya un dialectu del xéneru", resalta'l pidimientu.
A lo último, el testu recuerda que "Rosendo recibió la Medaya d'Oru al Méritu en Belles Artes, tien una cai col so nome en Leganés, tocó na cárcel de Carabanchel y nel Palau de la Música de Barcelona, pero tamién llevó la so descastada Fender Stratocaster hasta la última localidá española, nuna xira ensin fin".
"Ye'l momentu de certificar una carrera honesta, coherente y referencial con una estatua nel so barriu", conclúi'l pidimientu. Les firmes van ser llevaes a la Xunta Municipal del Distritu de Carabanchel y al Conceyu de Madrid. "Vamos Dir alantre porque tamos agradecíos a Rosendo. El bustu ye nuesu", remacha.
