UVIÉU, 20 Abr. (EUROPA PRESS) -
CCOO d'Asturies anunció que va sumase a la manifestación pola oficialidá d'esti 21 d'abril "pa renovar el so compromisu cola recuperación y la normalización del asturianu y el gallego-asturianu". Nesi sentíu, criticó la "ofensiva" del PP contra la oficialidá y acusó a esti partíu d'atacar l'asturianu porque ye "la llingua de la clase trabayadora, a la qu'ellos nunca representaron".
Al traviés d'un comunicáu, CCOO volvió mostrar el so apoyu a la movilización qu'esti sábadu qu'entama la Xunta pola Defensa de la Llingua Asturiana a les 12.00 n'Uviéu porque "los fechos asocedíos nos últimos meses faen más necesaria que nunca la nuestra participación".
"Mentanto que los informes emitíos pola UNESCO y los estudios sociollingüísticos presentaos nel 2017 alvierten de que'l marcu llegal vixente nun ye a garantizar la sobrevivencia de la llingua, el Gobiernu asturianu, Ciudadanos y el PP opónense dafechu a la posibilidá de modificar l'Estatutu d'Autonomía pa da-y l'estatus xurídicu que precisa, que ye la oficialidá", afirma CCOO.
Nesi sentíu, acusen al PP de facer una "ofensiva" pa convencer a la ciudadanía de que la oficialidá nun ye buena p'Asturies, "esperando sacar d'ello un beneficiu políticu". "Estos ataques al asturianu nun son casuales: la llingua asturiana ye la llingua del pueblu, la llingua de la clase trabayadora, a la qu'ellos nunca representaron", señala'l sindicatu.
