UVIÉU, 19 Abr. (EUROPA PRESS) -
CCOO, UXT, Suatea y CSI mostraron el so apoyu a la manifestación pola oficialidá del asturianu y del gallego-asturianu qu'entama esti sábadu la Xunta pola Defensa de la Llingua Asturiana (XDLA) porque "agora ye'l momentu" y porque esti marcu llegal "ye la única manera de garantizar el derechu a estudiar asturianu y dignificar l'asignatura".
Asina lo señalaron los sindicatos nun comunicáu conxuntu que presentaron esti xueves n'Uviéu n'apoyu al Proyectu 2018, iniciativa de la XDLA que busca algamar la oficialidá anguaño, y a la manifestación d'esti sábadu, que sal a les 12.00 hores de la Estación del Norte d'Uviéu.
Na rueda de prensa, celebrada na sede d'UXT de la capital asturiana, tuvieron presentes por esti sindicatu la responsable d'Educación Maxi Fernández Otero; por CCOO la secretaria de Llingua Asturiana, Marta Mori; el responsable de Llingua Asturiana de Suatea, Xosé Lluis Colodrón; y por CSI, Xosé Daniel Rodríguez.
Nel comunicáu conxuntu, lleíu por Marta Mori, los cuatro sindicatos afirmen que la falta d'oficialidá xenera una "desigualdá llegal" que tien efectos "negativos pa los falantes, pon torgues a la normalización y al estatus curricular de l'asignatura".
Por eso, afirmen que namás la oficialidá "pue garantizar el derechu a conocer el patrimoniu llingüísticu asturianu, amás de ser la única manera de dignificar y regularizar la enseñanza de la llingua propia".
"La oficialidá pon los cimientos d'un edificu qu'hemos de construir ente tolos ciudadanos y ciudadanes d'Asturies", indicaron, pa esplicar qu'agora ye'l momentu de que los políticos "asuman la so responsabilidá histórica no que cinca a la sobrevivencia, normalización y tresmisión xeneracional del asturianu y del gallego-asturianu".
Nesi sentíu, tolos representantes sindicales incidieron nel momentu históricu que se presenta p'algamar la oficilidá. Asina, la responsable d'Educación n'UXT, Maxi Fernández Otero, afaló a participar na manifestación del sábadu "porque ye'l momentu de tar ehí y de la oficialidá".
Otra manera, dende Suatea, Colodrón esplicó que nuna sociedá del sieglu XXI la escolarización ye fundamental pa la supervivencia d'un idioma, "polo que la oficialidá ye una condición mínima y un exerciciu de responsabilidá ente una situación de desequilibriu ente llingües".
SITUACIÓN DE L'ASIGNATURA
Los cuatro sindicatos esplicaron que la falta d'oficialidá supón que los más de 400 profesores qu'imparten asturianu nun puen presentase a oposiciones o optar a un concursu de tresllaos, una situación que Xosé Daniel Rodríguez de CSI calificó como una "situación de marxinación del profesoráu".
Por eso, afirmaron que la oficialidá supondría da-y normalidá a l'asignatura, anque nun quixeron entrar nel modelu a desarrollar nel ámbitu educativu si se llega a reformar l'Estatutu pa incluir la oficialidá, anque sí esclariaron que tendría qu'introducise d'una manera progresiva.
"Ye mui ceo pa entrar neses cuestiones cuando nun hai nengún partíu que presentara un modelu d'oficialidá. La oficialidá significa que l'asturianu sería una asignatura normal, anque habría esceiciones", esplicó Mori.
Per otru llau, a preguntes de los periodistes, los responsables d'educación de los principales sindicatos asturianos calificaron de "mui negativa" la propuesta del PP, refugada pola Xunta Xeneral, pa que l'asignatura d'asturianu en Primaria entrara a competir con otres materies, como francés o informática, en vez de tener l'alternativa de cultura asturiana.
Asina, Colodrón esplicó qu'esta propuesta ye una muestra de lo que'l PP nun s'atreve a dicir "que ye que ta en contra de que s'enseñe asturianu" y que con esto pretenden incumplir la Llei d'Usu, "que fala de voluntariedá", esplicando qu'esta midida supón convertir l'asignatura d'asturianu nuna materia optativa.
Per otru llau, Mori esplicó que de tenese aprobáu una midida asina supondría privar a los neños que quieren estudiar asturianu de poder deprender una segunda llingua estranxera "y eso nun lo permite la Llei d'Usu".
