AVILÉS, 28 de Payares (EUROPA PRESS)
Cerca de 900 trabayadores d'ArcelorMittal n'Asturies podíen acoyese al programa de baxes voluntaries pal conxuntu del grupu propuestu ayeri pola multinacional que podía afeutar hasta a 9.000 emplegaos en tol mundu y a unos 6.000 nel acasu d'Europa. Esta cifra "diba ser más o menos el númberu d'emplegaos que cumplen el perfil de los puestos a los que van dirixida la midida", según esplicaron a Europa Press fontes sindciales.
Según comunicó ayeri la compañía, esta midida oriéntase principalmente a emplegaos d'árees non directamente rellacionaes cola producción y, en particular, al personal de departamentos d'estructura en tol mundu. Sicasí, los sindicatos aseguraron que "nun s'especifica nada, nin datos por países, nin se va aplicar de manera proporcional, nin nada de nada".
Demientres la mañana de güei los representantes sindicales de les factoríes asturianes caltuvieron un conceyu pa tratar l'anunciu fechu ayeri por una multinaiconal. En declaraciones a Europa Press fontes sindicales manifestaron que "de nenguna manera van aceptar perda d'emplegu na fábrica d'aceru y únicamente van permitise baxes voluntaries si éstes s'acordaron col personal afeutáu".
De la mesma manera, los sindicatos volvieron a calcar les sos crítiques hacia la direición de la compañía por "los modos nos qu'anuncien les midíes a tomar". "Mos convoquen a un conceyu mos faen un anunciu que yá escuchamos pola prensa, ensin damos opción dalguna a negociar", destacaron fontes sindicales.
