UVIÉU, 18 Oct. (EUROPA PRESS) -
Cinco directores de centros de Primaria y Secundaria d'Avilés y Ayer afirmaron que nun recibieron el material que consta nes factures de la Conseyería d'Educación cuando taba dirixida por José Luis Iglesias Riopedre. La declaración producióse en sede xudicial en rellación col 'casu Marea 2', onde s'investiguen los pagos de nueve millones d'euros en conceutu de material escolar.
Al traviés d'una nota de prensa, el Obsevatoriu Ciudadanu Anticorrupción (OCAN), que se presentó como acusación particular nesti casu, dio a conocer que los cinco directores prestaron esti miércoles declaración testifical en sede xudicial. Too esto rellacionáu cola investigación d'estos pagos en conceptu de material escolar pa 87 colexos, institutos y escueles d'idiomes asturianos.
Alberto Suárez, abogáu qu'actúa en representación d'OCAN, resaltó que de les declaraciones realizaes constatóse que nun recibieron los materiales que consten nes factures, "pues tolos declarantes negaron que se recibieren nos sos respectivos centros docentes".
El representante xurídicu d'OCAN va solicitar agora que presten declaración les persones a les que se-yos atribúi la firma de les actes de recepción, "pa que puedan manifestar la realidá o non de les mesmes".
Estos fechos que tán siendo investigaos xudicialmente asocedieron presuntamente mentes los años 2009 y 2010, con José Luis Iglesias Riopedre al mandu de la Conseyería d'Educación del Principáu.
