YEDÁ, 15 Ene. (Reuters/EP) -
Arabia Saudina volvió proyectar películes cinematográfiques esta fin de selmana depués de mantener les autoridaes saudines mentes los últimos 35 años una prohibición d'exhibición de películes na pantalla grande.
La primer película proyectada, n'una sala de cine improvisada, foi un llargumetraxe d'animación infantil. A partir d'agora, van permitise proyecciones n'establecimientos temporales, como'l de la ciudá de Yedá, na Mar Bermeya, equipáu con un proyeutor, una alfombra colorada y una máquina de palombines de maíz. En marzu van abrir definitivamente les sales de cine permanentes.
"Pel momentu nun hai infraestructura abondo nes sales de cine, polo que tamos tratando d'aprovechar los sitios que tenemos pa averanos al estilu cinematográficu", dixo'l director de Cinema 70, Mamdouh Salim, con una empresa qu'entamó les proyecciones d'esta selmana. "Ye la primer proyección cinematográfica depués de la decisión del 11 d'avientu de permitir sales de cine", recordó Salim.
"Como regulador industrial, la Comisión Xeneral de Medios Audiovisuales empezó'l procesu p'autorizar los cines nel reinu", señaló n'avientu'l ministru de Cultura y Información del Gobiernu saudín, Awad bin Salé Alawad, que destacó que'l desarrollu del sector va crear "oportunidaes nueves d'empléu y capacitación" y va aumentar "les opciones d'entretenimientu".
Pal añu 2030, Arabia Saudina va abrir más de 300 cines con más de 2.000 pantalles, según esplicó'l Gobiernu, que confía en que la industria cinematográfica inyecte na economía nacional más de 90.000 millones de riales (unos 20.000 millones d'euros). Amás, espérase la creación de 30.000 puestos d'empléu fixos pa 2030.
Según fontes del sector, les cadenes de cine rexonales taríen yá estudiando la posibilidá d'instalase n'Arabia Saudina, onde los mozos tienen un altu poder adquisitivu y representen alredor del 70 por cientu de la población.
"Quiero ver too porque ye dalgo nuevo p'Arabia Saudina", dixo Ibtisam Abu Talib, un cinéfilu de 30 años. "Espero que too tea disponible: acción, romance, películes infantiles, comedies", añadió.
"Ye más cómodu y más risonderu camudar d'escenariu y d'actividá mentes la fin de selmana", dixo Sultan Al Otaibi, de 28 años, depués d'asistir a una proyección cola so esposa y fía el domingu pela nueche.
