SANAÁ, 27 de Marzu (Reuters/EP)
Aviones de combate de la coalición liderada por Arabia Saudina bombardiaron esti vienres el palaciu presidencial na capital yemenina, Saná, controlada por milicianos del movimientu huthi, asina como por zones controlaes pol grupu chiín nel norte del país.
Residentes llocales afirmaron que los ataques aéreos centráronse nes bases de la Guardia Republicana, lleal al anterior presidente, Ali Abdulá Salé, principal aliáu de los milicianos huthis, nel entornu de Saná. La ofensiva entamó al alborecer y tamién tuvo como oxetivu una instalación militar qu'acoyía misiles.
Los bombardeos golpiaron una base aérea na rexón de Marib, al noroeste de la capital, y estruyeron una estación radar a namás cinco kilómetros de les esplotaciones petrolíferes de Safer, tal como informó la población llocal. La rexón de Marib nun ta controlada polos milicianos huthis, pero cuenta con presencia de fuerces lleales a Salé.
Les ofensiva tamién se centró en Saada, una provincia septentrional y principal bastión de los huthis, según afirmaron fontes tribales a l'axencia Reuters. La coalición atacó un mercáu nel que morrieron o resultaron firíes sobre 15 persones.
Ésta ye la segunda xornada d'ataques lideraos pola vecina Arabia Saudina, que busca facer recular a los rebeldes chiínos de la so estensión nel sur de la península arábiga y apoyar l'autoridá del presidente, Abdo Rabbu Mansur Hadi, que ta n'Arabia Saudina.
Pela so parte, el líder huthi, Abdel Malek al Huthi, criticó duramente a Arabia Saudina, a la que llamó "mal vecín" y "un cuernu de Satán", y amenazó a la coalición asegurando que los yemeninos van enfrentase a l'agresión criminal, "inxusta ya inxustificada".
La intervención saudina supón una escalada militar na crisis de Yemen, país tornáu nun tableru xeoestratéxicu colos intereses de los países de la zona representaos en dambes partes. Per una parte, los chiínos huthis, defendíos por Irán, mientres que los yemeninos suninos, qu'apoyen a Hadi, tán apoyaos poles monarquíes del golfu.
Irán denunció la repentina ofensiva contra los huthis y esixó'l cese de les operaciones diríes por Arabia Saudina.
