UVIÉU, 19 de Payares (EUROPA PRESS)
La comisión d'investigación sobre'l conocíu como 'casu Villa' estableció esti miércoles el cronograma de les fases de los trabayos, cola previsión de dedicar el mes d'avientu al pidimientu y recepción de documentación y d'habilitar el mes de xineru pa solicitar y celebrar les sesiones de comparecencies.
D'esta manera, la comisión d'investigación sobre la xestión de los Fondos Mineros y la supuesta fortuna tapecida de José Ángel Fernández Villa acordó, a lo último, nun acompasar ambes fases ante la carga d'actividá parlamentaria propia del mes d'avientu, especialmente centrada na tramitación y debate presupuestario, qu'enzancaría l'asignación de feches pa les comparecencies.
Según esplicó a los medios el presidente de la comisión, el diputáu d'UPyD Ignacio Prendes, los grupos optaron por caltener el procedimientu ordinariu d'esti tipu de comisiones y entamar l'actividá colos pidimientos de documentación pa, de magar el 7 de xineru, siguir coles solicitúes de comparecencies, que podríen llevase a cabu nos últimos díes del mes de xineru.
Asina, el propósitu de la comisión ye entainar el procesu "dientro de los plazos "reglamentarios" pa disponer en febreru de tola información necesaria que permita ellaborar y debatir les conclusiones, teniendo en cuenta qu'a últimos de marzu disolveríase la Cámara asturiana ante la convocatoria d'elecciones autonómiques.
"Tenemos que completar los trabayos en febreru pa poder debatir les conclusiones", comprometió, aspirando a que la comisión se desarrolle con axilidá y precisión". "Lo importante de tou esti trabayu ye poder ofrecer unes esplicaciones a la sociedá asturiana d'un asuntu que preocupa muncho", recalcó.
