UVIÉU, 22 de Mayu (EUROPA PRESS)
El voceru del Conceyu Abiertu pola Oficialidá (CAO), Fernando Ornosa, aseguró güei que'l Partíu Popular asturianu tien "la clave pa la reconocencia oficial de la llingua na reforma del Estatutu d'Autonomía". Fizo asina un llamáu a esti partíu de cara a la so postura sobre esti tema na redaición de la ponencia que se ta desarrollando nestos momentos.
Nuna rueda prensa, Ornosa lleyó un comunicáu nel que fizo un llamáu al Partíu Popular pa que "cumpla'l so programa electoral y se tengan en cuenta les declaraciones públiques de numberosos y destacaos dirixentes populares favor de la oficialidá". "Nun ye batante colos bonos xestos, porque agora ye'l momentu y bien llueu, va ser tarde pa garantizar la sobrevivencia de l'asturianu", señala'l testu.
Dempués d'espresar el so puntu de vista pesimista sobre la cuestión, afirmó que "hai una puerta abierta tovía, y la clave tienla'l Partíu Popular". Dempués aseguró que "si l'asturianu desapaez, va ser responsabilidá de los partíos que nun declararon la oficialidá nel estatutu".
Nesti sen, el comunicáu foi especialmente críticu cola Federación Socialista Asturiana, pola so postura contraria a la oficialidá. Asina, fizo un llamáu a esta formación pa "algamar el consensu que solucione esta inxusta situación. Según el CAO, "la voluntariedá d'utilizar una llingua contrapónse cola obligación de la FSA torgando que'l so usu seya llegal".
Ornosa criticó les declaraciones de dellos dirixentes socialistes asturianos sobre esti tema, y en concreto les de Manuel Ángel Rodríguez, conceyal del PSOE n'Uviéu, y Jesús Gutiérrez, secretariu d'organización. "Al primeru había que dici-y que que nun diera lleiciones de democraica a naide, cuando él y el so partíu tán escluyendo a una parte de la ciudadanía nuna sociedá democrática", señaló'l comunicáu, en referencia a la última polémica surdida ente esti edil y el responsable municipal de Cultura, José Suárez Arias-Cachero, pol apoyu d'esti últimu a la oficialidá.
"Al segundu había que dici-y qu'Asturies y los sos ciudadanos merecen un respetu y tener unos presupuestos y un gobiernu estable, y si la razón pa non tenelos va ser la oficialidá, la solución ye fácil: reconocer los derechos llingüísticos de los asturianos nun exerciciu de responsabilidá política y de madurez democrática", añadió.
AICIONES ESPECTACULARES.
Ornosa recordó que la campaña en favor de la oficialidá que desarrolla'l CAO coincidiendo con esti procesu de reforma del Estatutu va siguir p'alantre, coles concentraciones ante la Xunta Xeneral cada vez que se celebre'l conceyu de la ponencia, y con otres movilizaciones que van dir presentándose nos próximos díes. Ente elles, señaló dalgunes aiciones d'espectacularidá, anque nun precisó en qué van consistir.