MADRID, 9 de Febreru (EUROPA PRESS)
La Mesa del Congresu aprobó esti martes por unanimidá una nueva propuesta de Podemos pa reasitiar a los sos diputaos nel hemiciclu y que va suponer que'l líder del partíu moráu, Pablo Iglesias, puea sentase na primer fila d'escaños que tamién ocupa'l líder del PSOE, Pedro Sánchez, xusto penriba del bancu azul del Gobiernu.
Los miembros de la Mesa anunciaron tres la xunta del órganu de Gobiernu de la Cámara esti acuerdu algamáu ente PP, PSOE, Podemos y Ciudadanos, qu'a lo último aceptaron revisar la distribución d'escaños qu'aprobaron va trés selmanes y que nun prestó nin a Podemos nin a otros grupos minoritarios como ERC y el Mistu.
Esti nuevu acuerdu llega dempués de que'l secretariu xeneral del PSOE, Pedro Sánchez, avanzara la selmana pasada que taba dispuestu a facilitar que los diputaos de Podemos quedaren nun sitiu que-yos resultara más cómodu. Sánchez fizo estes declaraciones dos díes depués de que la Mesa avisara al partíu de Pablo Iglesias de que la so alternativa nun s'estudiaría si nun llograba más consensu que'l que yá aprobara la Mesa.
A lo último, salió alantre una segunda propuesta de Podemos, que siempre se quexó de que nengún de los sos diputaos diba sentase na primer fila y de que munchos d'ellos quedaben "nel gallineru".
Nel nuevu repartu, el PSOE caltiénse a la izquierda del hemiciclu, pero comparte 'quesín' con Podemos, que va asitiase a trés de los sos diputaos na primer fila, xusto detrás de la bancada del Gobiernu.
La parte central del Salón de Plenos, nel so llau izquierdu, van ocupala na so parte superior el restu de parlamentarios de Podemos --colos d'ERC nuna fila en mediu--, Democracia y Llibertá y los seis diputaos del PNV, dos d'ellos na primer fila detrás del Executivu, respetando la so ubicación tradicional que nunca se cuestionó.
Yá na metá derecha de la zona central van asitiase los 14 diputaos del Grupu Mistu, que se reagrupen no que cinca al primer repartu de la Mesa, anque van siguir estremaos en cuatro files y non en seis.
Tamién van tar nesta bancada lo mayor de los diputaos de Ciudadanos, que, sicasí, tamién van tener seis escaños xunto al PP nel ala derecha del salón de plenos, concretamente nos dos últimes files. Amás, cinco diputaos del partíu naranxa van sentase en primer fila detrás de la bancada azul del Executivu.
Según esti diseñu, Pedro Sánchez y Pablo Iglesias van compartir fila nel llau izquierdu del hemiciclu, anque'l so llugar definitivu va depender de si'l candidatu socialista consigue los apoyos necesarios pa salir investíu presidente del Gobiernu y, poro, baxa al bancu azul. Y tamién de si acepta la propuesta de Pablo Iglesias de ser el so vicepresidente lo que-y llevaría a sentase al so llau como miembru del Gobiernu.
