MADRID, 21 de Febreru (EUROPA PRESS)
El Congresu apoyó esti martes la toma en consideración de la proposición de Llei Integral de Llucha contra la Corrupción y Protección de los Denunciantes presentada por Ciudadanos, anque los grupos reprocharon a Albert Rivera y los suyos que la promovieren en solitario pa colgar "una medaya" y "chupar cámara" en cuenta de trabayar nuna iniciativa conxunta.
Al defender en tribuna la proposición de llei, el presidente de Ciudadanos recordó que la so iniciativa rexistróse'l pasáu 15 de setiembre p'actuar yá contra la corrupción, dao que considera qu'esti problema afecta a tol país. Al so xuiciu, lo mesmo'l PP como'l PSOE "lleven un ritmu d'imputaciones y condenes" qu'esplica por qué la corrupción ye unu de los asuntos que más preocupen a la ciudadanía.
LLEI ÓMNIBUS
Rivera pidió apoyu pa la so 'llei ómnibus' pa poder dicir a los españoles que'l Parlamentu va protexer a los bonos y "castigar a los malos", de forma que los primeros "tengan premiu, non castigu", y que quede claro que "quien la fai la paga".
La iniciativa inclúi asuntos como la prohibición de los indultos a condenaos por corrupción, un cambiu llegal que la Cámara yá almitió a tramite la pasada selmana a propuesta del PSOE. Según dixo, l'oxetivu ye detener "el ciclu del agua" que siguen dellos corruptos a los que "imputen, procesen, xulguen condenen y a lo último indulten", y que'l Gobiernu tenga que motivar cada indultu.
Tamién recueye midíes pa protexer a los denunciantes de la corrupción, empleaos públicos que son "héroes" pa Cs y qu'en dellos casos sufrieron "l'acosu y derribu de dellos partíos". Sobre esti asuntu comprométese a llexislar la Comisión de calidá de la Democracia.
Coles mesmes, la proposición de llei plantea tipificar el delitu d'arriquecimientu ilícitu, una midida cola que, según dixo Rivera, l'exvicepresidente Rodrigo Rato "nun podría doblar nun añu'l so patrimoniu sin dar esplicaciones".
Otres midíes que resaltó Rivera son la eliminación de los plazos máximos na instrucción penal, que ve como "una torga" del PP pa investigar la corrupción; mayores garantíes de la independencia y la imparcialidá de los secretarios y interventores de l'Alministración llocal; y la responsabilidá civil subsidiaria de los partíos políticos, sindicatos y organizaciones empresariales polos delitos que cometieren los sos emplegaos o representantes.
La llei de Ciudadanos pasó esti primer trámite parlamentariu, pero'l restu de grupos criticó la so presentación unillateral.
Juan Pedro Yllanes, ponente d'Uníos Podemos, aseguró que Ciudadanos actuó como "los llistos de la clase", copiando les propuestes de la Plataforma pola Honestidá y actuando por "posturéu" pa "facer lo que más-yos presta: chupar cámara".
¿Y AGORA QUÉ FACEMOS COLES COMPARECENCIES?
El socialista Pedro Muñoz dixo nun entender que se tea promoviendo esta llei, qu'hasta considera "imprecisa" y "corta", mientres na comisión anticorrupción hai pendientes decenes de comparecencies que puen resultar en "baldre". "Esta nun yera la forma, yera'l consensu, pero vamos trabayalo", repostió.
Más dura mostróse la vocera de Xusticia del PP, Beatriz Escudero, quien considera que Rivera "nun ye que ficiera demagoxa, ye que mintió" al dicir qu'hubo indultos xeneralizaos de corruptos.
"Doi-yos la bienvenida na llucha contra la corrupción, contamos con ustedes, pero alarmar a los ciudadanos o utilizar la demagoxa, lo único que produz ye'l debilitamientu del Estáu", avisó, achacando a Ciudadanos un intentu por "ponese la medaya".
