KARLSRUHE (ALEMAÑA), 3 Ago. (DPA/EP) -
El Tribunal Constitucional d'Alemaña refugó esti vienres el recursu presentáu por Ursula Haverbeck, de 89 años d'edá y conocida como la 'güela nazi', polo que se caltién la condena de dos años pola que ta ente rexes por negar l'Holocaustu.
La muyer foi sentenciada ensin posibilidá de llibertá condicional por comentarios qu'afalaben al odiu n'ocho casos distintos y en mayu foi detenida pa cumplir condena. El Constitucional negó qu'esta condena sía incompatible coles lleis sobre llibertá d'espresión.
Nun ye la primer vez que Haverbeck enfréntase a la xusticia polos sos comentarios, nos qu'amenorga los crímenes cometíos pol réxime de Adolf Hitler. En 2016 yá foi condenada a ocho meses de cárcel por unviar cartes al alcalde de Detmold y a un periódicu nel que negaba qu'Auschwitz fora un campu d'esterminiu.
Un añu enantes, recibiera otra pena de diez meses por asegurar nuna entrevista na televisión pública que "l'Holocaustu ye la mayor mentira y la más duradera de la historia". Amás, n'otres dos ocasiones la vieya foi condergada al pagu d'una multa.
