UVIÉU, 3 de Febreru (EUROPA PRESS)
L'últimu númberu del semanariu Les Noticies, periódicu impresu en llingua asturiana, publicóse fai güei cinco años. Concretamente, el vienres 3 de febreru del 2012.
El periódicu saliera a la cai el 6 de setiembre de 1996, de la mano de la editorial Ámbitu, y llegó a tener una tirada de 5.000 exemplares y, según los sos responsables, más de 20.000 lectores. Nes sos páxines escribieron persones como Berta Piñán, Marta Mori, Esther Prieto, Xabiero Cayarga, Pablo X. Suárez, Faustino Zapico, Xune Elipe, Damián Barreiro ó Ismael G. Arias. El so director yera Henrique G. Facuriella.
En declaraciones a Europa Press, el so fundador, l'empresariu editor Inaciu Iglesias, valora'l legáu d'aquel mediu, ya'l "so impactu, presencia ya influencia". "Nun hai nengún mediu que lu viniera a enllenar", añade, reconociendo que-y produz un "sentimientu d'arguyu" el pensalu.
Considera que l'espaciu dexáu por Les Noticies ha enllenase con otros proyectos pero "cinco años dempués entendemos que siguir calteniendo la mesma fórmula yá nun tien sen". Nesti momentu, el mediu impresu "nun tendría cabida porque los tiempos van per otru sitiu".
La crisis económica, la crisis del papel, y el nivel de vida de la xente mozo son los principales factores que, dende'l so puntu de vista, contribuyeron al zarru del periódicu.
