UVIÉU, 25 Abr. (EUROPA PRESS) -
Ediciones Saltadera acaba de publicar 'Incorrectos', segunda novela del periodista David Artime, autor d'una de les obres de más éxitu de la lliteratura asturiana; 'La bufanda'. Nesti llibru nuevu cuenta la historia d'amor d'Aníbal, un violentu neonazi bien conocíu nos ambientes de la estrema derecha madrileña, y Maitane, una militante d'ETA implicada en dos asesinatos.
"Un día los sos caminos entecrúciense y les sos vides cambien pa siempre. Entamen entós a percorrer un peligrosu camín a la busca d'un porvenir dignu. Atrás, el so pasáu. Delantre, un futuru inciertu. En mediu, l'aislamientu, la soledá y la opresión d'una sociedá hipócrita que solo perdona los errores cuando-y interesa. Pero ellos dos quieren siguir caminando. Quieren vivir. Quieren arrepentise anque nun sepian mui bien de qué", señalen dende Saltadera.
'Incorrectos' ye la segunda novela de David Artime Coto (Candás, 1979) depués de la exitosa 'La bufanda' (2010). Col telón de fondu del procesu de reinserción de presos d'ETA y de la violencia na cai de grupos radicales, esta historia quier ser un berríu contra la dictadura de lo políticamente correcto.
"Nuna sociedá bipolarizada, na que naide ye llibre, la ética sucumbió ente la estética y el sistema obliga al individuu non a ser bona xente, sinón a paecelo. Ye la tiranía del posturéu bienpensante. Quien se sal de los cánones yá sabe lo que-y queda: la esclusión y el linchamientu", indiquen dende la editorial.
La novela va presentase esti sábadu 28 d'abril a les 12.00 hores dientro de la I Feria del Llibru n'Asturianu de Candás, na Antigua Fábrica de Ortiz. Ellí va tar acompañáu pol editor y profesor de lliteratura asturiana de la Universidá d'Uviéu Antón García.
