RIBESEYA, 30 d'Abril (EUROPA PRESS)
El cuentu 'Ella y Ariel', del candasín David Artime Coto, foi'l ganador de la segunda edicición del concursu lliterariu Arbidel de cuentos eróticos n'asturianu, organizáu pol Ayuntamientu de Ribeseya dientro del marco de les actividaes de la Selmana de les Lletres Asturianes. Pela so parte, el participante xixonés Pablo Rodríguez Alonso algamó l'áccesit, con 'El confesor', presentáu baxo l'alcuñu de Guillaume de Vielhà.
El conceyal de Cultura de Ribeseya, Juan González Martino, fizo públicu'l fallu al traviés d'un comunicáu al que tuvo accesu Europa Press. El xuráu tuvo compuestu por Ana Luz Prieto Vega, especialista n'asturianu pola Universidá d'Uviéu; Roberto González-Quevedo González, secretariu de l'Academia de la Llingua Asturiana; y Xandru Martino Ruz, especialista n'asturianu pola Universidá d'Uviéu. Fizo de secretariu con voz, pero ensin votu, el mesmu conceyal de Cultura.
La entrega de diplomes va tener llugar el próximu miércoles, día 6 de mayu, a les 19.00 hores, na Casa de la Cultura de Ribeseya, nun actu incluyíu dientro de la programación de la Selmana de les Lletres, qu'entama la Conseyería de Cultura del Principáu d'Asturies, en collaboración cola Direición Xeneral de Política Llingüística, y qu'esti añu ta especialmente dedicada a la figura de la escritora asturiana Enriqueta González Rubín.
Ésta foi la segunda edición del concursu de cuentos eróticos. Na primera, celebrada l'añu pasáu, el premiu foi pa Xosé Nel Riesgo, pola obra 'De bandera', mientres que l'áccesit ganólu David Rivas, por 'Boedica y Doña Nuria'.
El premiu ta dotáu con 1.200 euros, mientres que pal áccesit resérvase un gratificación de 500.
