UVIÉU, 2 de Setiembre (EUROPA PRESS)
El númberu de paraos n'Asturies baxó en 1.057 persones n'agostu, lo que supón un descensu del 1,22 por cientu en comparanza col mes anterior, y asitió'l númberu de paraos na comunidá autónoma en 85.494, d'acuerdu a los datos publicaos pol Ministeriu d'Empléu y recoyíos por Europa Press.
A nivel nacional, el númberu de paraos rexistraos nes oficines de los servicios públicos d'empléu (antiguu Inem) aumentó en 21.679 persones n'agostu, hasta asitiase en 4.067.955 persones. Esta subida ye casi'l triple que la del mesmu mes del 2014, cuando subió en 8.070 persones.
Nel casu d'Asturies hai 7.799 paraos menos inscritos nes oficines d'empléu que n'agostu del añu pasáu, lo que supón un descensu del 8,36 por cientu en comparanza col últimu exerciciu.
Por sectores, prodúxose una baxada en tolos sectores n'Asturies, sobremanera nel sector servicios, onde la cayida foi de 485 persones. Tamién baxó'l paru nel colectivu Sin empléu anterior (-257), Construcción (-204), Industria (-110) y Agricultura (-1).
Polo xeneral, de los 85.494 paraos colos que cuenta Asturies, sigue siendo Servicios, con 57.712, el sector que mayor númberu de paraos tien, siguíu de Construcción , con 10.430 y Sin empléu anterior, con 8.331.
De siguío, un total de 7.523 persones alcuéntrase en situación de desempléu dientro del sector d'Industria, mientres que zarra la llista'l colectivu Agricultura, que, al rematar el mes pasáu, contaba con 1.498 paraos.
MAYOR NÚMBERU DE PARAES
Por sexu, les muyeres son mayoría nes llistes del desempléu n'Asturies, con 45.748, mientres que la cifra de los homes paraos algama los 39.746. La gran mayoría, 84.211, son mayores de 25 años, mientres que 6.206 tán perbaxo d'esa edá.
Tocantes a los paraos estranxeros, Asturies cuenta 5.803, con un descensu de 177 persones desemplegaes con respectu al mes anterior, un 2,96 por cientu, mientres que, nel cómputu interañal, baxaron en 205, un 3,41 por cientu menos. La mayor parte, 3.233, vienen de países estracomunitarios.
