UVIÉU, 17 de Xineru (EUROPA PRESS)
Los rexistros que se realizaron per parte de la Unidá Central Operativa (UCO) dende esta mañana na sede d'UXT d'Asturies acabaron con seis deteníos vinculaos a la dirección del sindicatu, incluyíu'l l'exsecretariu xeneral d'UXT Asturies, Justo Rodríguez Braga.
Según confirmó'l Xulgáu d'Instrucción nº 4 d'Uviéu, la operación desarrollóse dende esta mañana al amparu de les dilixencies que tien abiertes poles presuntes irregularidaes na xestión de les sovenciones pa formación del sindicatu UXT.
Concretamente'l Xulgáu ordenó'l rexistru de trés sedes sociales domiciliaes nel mesmu edificiu de la Plaza General Ordóñez d'Uviéu: la de la Unión Rexonal d'Asturies de la UXT, la delegación del Institutu de Formación y Estudios Sociales n'Asturies (IFES) y la empresa Iniciatives pa la Formación n'Asturies (Infastur).
Nel marcu de la mesma operación resultaron deteníes en dellos puntos del Principáu seis persones. Amás de Justo Rodríguez Braga tamién se detuvo a miembros del sindicatu, d'IFES y d'Infastur, directamente rellacionaos, pol so cargu actual o anterior, cola alministración y xestión de les sovenciones pa formación.
A los deteníos tán treslladándolos a la Comandancia d'Uviéu, onde van practicase les dilixencies pertinentes y, al cabu de les mesmes, van pasar a disposición xudicial, sin poder precisar tovía'l día concretu en que lo fairán.
REXISTRU DETALLÁU
Otres fontes de la investigación consultaes pOR Europa Press esplicaron que, de primeres, nun se preven más detenciones mientres el día y que los deteníos son persones vinculaes a la dirección del sindicatu na etapa de Rodríguez Braga, que decidió nun optar a la reelección nel 2016 y al que lu asocedíu Javier Martínez Lanero. Nun se descartar que puea haber rexistros a lo llargo de la xornada n'otros llugares rellacionaos col casu.
Foi va poco más d'un añu cuando'l fiscal Gabriel Bernal formuló denuncia ante'l xulgáu pola supuesta actuación fraudulenta en materia de sovenciones públiques llevada a cabu pol sindicatu UXT al traviés de la so fundación, l'Institutu de Formación y Estudios Sociales.
Les dilixencies d'investigación entamaron incoaron nel mes d'avientu del 2014, tres un informe presentáu en Fiscalía pola UCO denunciando una relación de fechos que podríen ser constitutivos d'un delitu contra la Facienda Pública y otru de falsedá documental.
El fiscal señalaba que los fechos referíense, n'esencia, a una supuesta actuación fraudulenta en materia de sovenciones públiques llevada a cabu dende un tiempu sin precisar, pero que se remontaría a munchos años atrás, pol sindicatu UXT, al traviés de la so fundación IFES, con sedee en Madrid y con delegaciones territoriales, pa la realización d'actividaes formatives y d'estudios sociales.
SEMEYANCES COL FRAUDE D'ANDALUCÍA
Nel informe indicábase que los fechos guardaben semeyanza colos que se taben investigando n'otru procedimientu penal abiertu nel Xulgáu d'Instrucción númberu 9 de Sevilla. Precisamente, pol ampliu espardimientu públicu d'esa información, la unidá policial recibiría información per parte d'una persona sobre la existencia de fechos asemeyaos rellacionaos territorialmente con Asturies.
Dende'l sindicatu UXT, yá nel tiempu en que se conoció la denuncia del fiscal insistieron en tou momentu na "absoluta llegalidá" de les actuaciones llevaes a cabu en materia de formación y consideró "sorprendente" que la denuncia llegara tres un añu d'investigación na que nun s'alcontraron pruebes. Tamién pidíen que'l casu s'esclare de forma definitiva, porque l'asuntu taba faciendo munchu dañu al prestixu de la organización.
La operación d'esti martes consistió nun detalláu rexistru na oficina central d'UXT n'Asturies, en plenu centru d'Uviéu. Una decena d'axentes entraben antes de les 9.00 hores y centraron el so trabayu fundamentalmente na primer planta.
UXT-Asturies emitió un comunicáu tres los rexistros nos que volvió insistir en que siempre actuó acordies cola llegalidá vixente y la normativa y mostró la so disposición a collaborar cola Xusticia en tolo necesario.
