MADRID, 15 Abr. (EUROPA PRESS) -
Esti martes 15 d'abril va tener llugar un eclís total de Lluna qu'inaugura'l periodu conocíu popularmente como 'cuatro llunes de sangre' y que nun asocede dende los años 2003-2004. Trátase d'una sucesión d'eclises, que nesti casu tienen llugar ente 2014 y 2015, nos que'l satélite de la Tierra adquier un característicu color coloráu.
Científicamente, esti sucesu de cuatro clises totales siguíos denomínase tétrada y ye "bien pocu habitual", según esplicaron los espertos, anque apunten que se va producir siete veces más nel sieglu actual.
En cuanto al estrañu color qu'adquier la superficie de la Lluna vista dende la Tierra, tien esplicación física: l'atmósfera del planeta, que s'estiende unos 80 kilómetros más allá del diámetru terrestre, actúa como una lente, esviando la lluz del sol, de la que penera conducentemente los sos componentes azules, dexando pasar solo lluz colorada que finalmente va ser reflexada pola Lluna, dándo-y una rellumada cobriza.
Sicasí, hai quien caltien la creencia de qu'estos episodios ta rellacionaos con pasaxes apocalípticos. Concretamente, yera el color acoloratáu'l que creaba medrana ente los antiguos habitantes de la Tierra, pa quien tenía un significáu de fatalidá. Tamién se rellaciona con pasaxes de la Biblia como: "El sol va tornar en tiniebles, y la lluna en sangre, primero que venga'l día grande y espantible del Señor" (Joel, 2:31).
L'astrónomu del IAC Miquel Ferrucha-Ricart, esplicó que va ser "un eclís especial por dellos motivos", ente ellos que "forma parte d'una tétrada d'eclises totales que van asoceder nun intervalu averáu de seis meses ente ellos y va acabar col eclís total de Lluna del 28 de setiembre de 2015, l'únicu visible na so totalidá dende Europa".
L'axenda astronómica determina que, tres l'eclís d'esti martes, la serie va siguir el 8 d'ochobre del 2014, el 4 d'abril del 2015 y el 28 d'ochobre del 2015. Toos ellos son totales. Esto asocede cuando la Lluna pasa pola solombra de la Tierra y ésta la tapa dafechu. Esto nun asocede tolos meses, porque la órbita de la Lluna ta inclinada al respective de la de la Tierra.
Esti tipu de sucesos, a diferencia de los solares, son visibles dende cualquier llugar del mundu, una vegada que la Lluna ta sobre l'horizonte nel momentu del eclís, según informó l'Institutu d'Astrofísica de Canaries (IAC), que precisa que, dependiendo de la parte del mundu nel qu'unu s'atopa puede reparase l'eclís en distintes fases.
NAMÁS VISIBLE EN CANARIES
Asina, n'Europa, dependiendo del allugamientu, puede llegase a ver cómo la Lluna empecipia'l so pasu pela parte penumbral de la solombra de la Tierra a les 06.53 hores (hora peninsular) del 15 d'abril y a les 09.06 hores el satélite entra na parte más escura (o "umbra"), polo qu'en munchos llugares del continente yá s'escondería. Ello ye que n'España namás podrá vese dende les Isles Canaries la fase inicial y cola Lluna raspiando l'horizonte oeste y cerca del amanecer.
Ante esta situación, un equipu d'astrónomos del proyectu GLORIA va retresmitir en directu --al traviés de les web 'live.gloria-project.eu' y 'sky-live.tv'-- l'espectáculu astronómicu dende l'enclave inca de Saksaywaman, un complexu cercáu na periferia norte de la ciudá de Cusco (Perú). Mientres la totalidá, los internautes van poder comprobar que la Lluna nun desaparez de la vista, sinón qu'adquier la tonalidá acoloratada. GLORIA tamién va reparar l'eventu dende'l cume del Teide.
Pa información sobre los horarios de la retresmisión lo mesmo que de otres actividaes de GLORIA puede aportase a la páxina 'gloria-project.eu'. Tres centros de supercomputación españoles CETA-Ciemat (Centru Estremeñu de Tecnoloxíes Avanzaes), CSUC (Consorci de serveis Universitaris de Catalunya) y el IAC (Institutu d'Astrofísica de Canaries) collaboren na distribución d'esta retresmisión.
