UVIÉU, 3 de Setiembre (EUROPA PRESS)
El Gobiernu del Principáu d'Asturies va analizar la creación d'un modelu de xestión de pa les escueles de 0-3 años, consensuáu con conceyos, families y organizaciones sociales.
Asina quedó de manifiestu nuna xunta que'l conseyeru d'Educación y Cultura, Genaro Alonso, caltuvo colos aprosimao 300 equipos directivos de les escueles de Primer Ciclu d'Educación Infantil y los centros públicos d'Educación Infantil y Primaria pa tratar l'entamu de cursu 2015-2016.
A la xunta tamién asistieron el director xeneral de Personal Docente y Planificación Educativa, Roberto Suárez; el director xeneral d'Enseñances Profesionales y Aprendizaxe Permanente, Manuel Capellán; el director xeneral d'Ordenación Académica ya Innovación Educativa, Francisco Llaviana; el director xeneral de Planificación Llingüística y Normalización, Fernando Padilla; y la xefa del Serviciu d'Inspección Educativa, Dolores Guerra.
Mientres l'alcuentru, el conseyeru manifestó'l so refugu al Real Decretu d'Evaluaciones Esternes, impuestu pol Ministeriu d'Educación, Cultura y Deporte, qu'esti cursu afecta a la etapa educativa de 6º de Primaria.
"Estes pruebes nin son necesaries, nin convienen al sistema, nin al alumnáu y topeten col procesu d'evaluación continua", señaló. Nesti sen, el responsable d'Ordenación Académica anunció que la conseyería alcuéntrase a la espera de la decisión ministerial pa saber de qué forma plantégase la midida nos centros educativos.
Llaviana tamién manifestó la intención del departamentu de siguir col Contratu-Programa nos centros d'Educación Infantil y de Primaria, al qu'esti cursu incorporaránse once centros educativos.
Tocantes a la Planificación Llingüística, Padilla recordó que la Conseyería d'Educación solicitó al Ministeriu la creación de la especialidá docente de Llingua Asturiana y Lliteratura. Amás, aseguró que se va siguir coles campañes de promoción pa matriculase n'asturianu, según informó'l Gobiernu rexonal al traviés d'una nota de prensa.
Mientres l'alcuentru, el conseyeru felicitó a los Colexos Rurales Agrupaos (CRAs) y a les escueles unitaries pola Medaya de Plata del Principáu d'Asturies. Alonso tamién anunció que la inauguración del curso Educación Infantil y Primaria va tener llugar nel CPEB de Cabanaquinta (Ayer).
