UVIÉU, 27 de Mayu (EUROPA PRESS)
Un grupu d'empleaos d'Ebhisa, la empresa que xestiona la estiba de graneles sólidos d'El Musel, torgó mientres una hora la descarga d'un barcu de mineral de fierro per parte d'otra empresa, Consignaciones Asturianas. Esta segunda firma taba encargándose del llabor, por cuenta de la güelga que ta secundando la plantiya de la primera.
Según esplicó'l presidente del Comité d'Empresa d'Ebhisa, Fernando González, en declaraciones a Europa Press, esti martes a última hora enteráronse de que la empresa Consignaciones Asturianas, que s'encarga del restu de la estiba que nun cubre Ebhisa, descargaría'l barcu Cóndor, que llegó al puertu d'El Musel con 50.000 tonelaes de mineral de fierro p'ArcelorMittal.
A les ocho de la mañana, los empleaos d'Ebhisa celebraron una asamblea urxente. Darréu, treslladáronse al puntu nel que les dos grúes de Consignaciones taben depositando'l mineral de fierro, estremáu en dos montones. Los güelguistes subiéronse a lo alto de les piles y permanecieron mientres una hora engaramaos nelles, hasta que la Policía Nacional y la Guardia Civil acudieron al llugar pa obligalos a baxar. Nun opunxeron resistencia.
Darréu, los empleaos d'Ebhisa celebraron una concentración ante la sede de l'Autoridá Portuaria na que reclamaron la dimisión de Rosa Aza, presidenta del Conseyu d'Alministración del puertu y tamién del de la empresa.
Ebhisa vivió esti martes la primer xornada de la güelga convocada pa esixir a la empresa que cumpla la sentencia qu'anula la supresión de determinaos puntos del conveniu, que conllevó una amenorga salarial dende setiembre pasáu. El comité caltién la convocatoria de paru pa los díes 28 y 30 de mayu, y 1, 3, 4, 5, 6, 7 y 8 de xunu.
Esti xueves van celebrase una nueva asamblea na que van estudiar la posibilidá de prollongar la güelga en casu de que la empresa nun acepte les sos esixencies.
