BARCELONA, 1 Oct. (EUROPA PRESS) -
La secretaria xeneral y diputada d'ERC nel Parlament, Marta Rovira, esixó esti miércoles al Gobiernu catalán que caltenga la campaña institucional de la consulta soberanista pa nun ser "cómpliz de la suspensión" del 9 de payares decretada pol Tribunal Constitucional (TC).
Nuna intervención énte'l plenu del Parlament, dixo que'l partíu republicanu ta dispuestu a asumir "les responsabilidaes polítiques y les inhabilitaciones" que faigan falta pa cumplir coles mires de que los catalanes voten na consulta.
Amás, aseguró que "milenta trabayadores públicos y funcionarios" dirixéronse a ERC pa espresar la so determinación a siguir cola campaña y la organización de la consulta pese a les midíes cautelares decretaes pol TC.
El conseller de Presidencia y voceru del Executivu catalán, Francesc Homs, retrucó que'l Govern nun ye cómpliz del Altu Tribunal, daqué que se demuestra con que la Generalitat yá presentó argumentos "bien sólidos y bien completos" escontra la suspensión.
Homs insistió en criticar que'l Gobiernu central impugnó la consulta con considerances "poco xurídiques y bien irresponsables", y llamentó que l'Executivu central actuó ensin diálogu y ensin sentíu d'Estáu.
