Barroso ve "desaxeradamente difícil, si non imposible" que vuelva entrar y pon d'exemplu a Kosovo
BRUXELES, (EUROPA PRESS)
Escocia va quedar automáticamente fuera de la Xunión Europea y de la OTAN si gana'l 'sí' nel referéndum sobre la independencia del próximu xueves y tendrá que pidir la entrada en dambes organizaciones, que tien que ser aprobada por unanimidá polos Estaos miembros. La Comisión y el Gobiernu escocés discrepen sobre'l grau de dificultá qu'entrañaría esti procesu.
El presidente del Executivu comuñal, José Manuel Durao Barroso, avisó de que va ser "desaxeradamente difícil, si non imposible" qu'Escocia pueda reingresar na XE tres la so independencia yá que dellos Estaos miembros, ente los que punxo d'exemplu a España, podríen vetar l'adhesión escocesa pa nun dar esnales a los sos propios movimientos separatistes.
"España opúnxose inclusive a la reconocencia de Kosovo, por casu, qu'hasta ciertu puntu ye un casu similar", dixo Barroso nuna entrevista a la BBC el pasáu mes de febreru. "El procesu nunca sería fácil, plantegaría munches dificultaes", insistió.
El presidente de la Comisión unvió en 2012 una carta al parlamentu británicu na qu'espón la doctrina oficial de Bruxeles sobre les consecuencies de la independencia d'una parte del territoriu d'un Estáu miembru. Esta doctrina data de 2004 y l'Executivu comuñal remanólu tamién pal casu de Cataluña.
"Si parte del territoriu d'un Estáu miembru dexa de ser parte d'esti Estáu porque se convierte nun nuevu Estáu independiente, los Trataos dexaríen d'aplicase a esi territoriu. N'otres pallabres, un nuevu Estáu independiente convertiríase, pol fechu de la so independencia, nun país terceru al respeutive de la XE y los Trataos yá nun s'aplicaríen nel so territoriu", esplicaba Barroso.
Si una Escocia independiente deseyara formar parte de la XE, tendrá de pidir l'adhesión, que tien de ser aceutada "unánimemente" polos Ventiocho Estaos miembros y sometida "a la ratificación de tolos Estaos miembros y del Estáu candidatu".
El próximu presidente de la Comisión, Jean-Claude Juncker, yá dexó claro que va siguir esta doctrina. "Ún nun se convierte en miembru de la XE unviando una carta", resaltó al ser preguntáu en xunetu pol eurodiputáu d'ERC, Josep Maria Terricabras, por cuál sería la so reacción énte la posible independencia d'Escocia y Cataluña.
En contraste, el ministru principal escocés, Alex Salmond, sostién qu'una Escocia independiente va poder axustar la so permanencia na XE nun plazu amenorgáu de 18 meses y aliega que'l mayor riesgu de salida ye quedase en Reinu Xuníu, una y bones el primer ministru, David Cameron, quier celebrar en 2017 un referéndum sobre la so permanencia na XE.
"El Gobiernu escocés reconoz que siguir siendo miembros de la XE va riquir negociaciones sobre les condiciones concretes. Ye xusto y afayadizo. Pero estes negociaciones van completase nel periodu de 18 meses ente un 'sí' en setiembre y el llogru de la independencia en marzu de 2016", dixo Salmond nun discursu énte'l colexu de Bruxes n'abril.
Tocantes a la OTAN, el Gobiernu escocés dio anuncia de qu'en casu d'independencia la so intención ye xuntase a l'Alianza Atlántica como Estáu llibre d'armes nucleares. El secretariu xeneral de la OTAN, Anders Fogh Rasmussen, volvió repitir esti llunes qu'una Escocia independiente tendría que llograr un sofitu unánime de los países miembro si quier reingresar.
"Si un nuevu Estáu independiente quier ser miembru de la OTAN va tener que solicitar la so pertenencia. Y una solicitú tal va ser tratada esactamente de la mesma manera que toles solicitúes y, a la fin, va riquir el consensu, la unanimidá, p'aceutar a un nuevu miembru de l'Alianza", esplicó nun coloquiu en Bruxeles.
Al marxe de les distintes interpretaciones, la victoria del 'sí' nel referéndum del xueves va provocar un terremotu na XE de consecuencies difíciles de predicir al poner en cuestión por primer vegada les fronteres de los Estaos miembros.
