UVIÉU, 28 Sep. (EUROPA PRESS) -
La escritora y vicepresidente de l'Academia de la Llingua, Marta Mori, afirmó que ye "de llamentar" que l'Institutu Cervantes nun considere al asturianu una llingua más pol fechu de nun ser oficial. Per otru llau, l'escritor Pablo Texón diz que la institución mostró "falta d'altura de mires".
Asina se posionaron estos dos escritores, dos de los nomes de más sonadía de les lletres asturianes, depués de que l'Institutu Cervantes celebrara un Bruxeles un recital de poesía "nes cuatro llingües d'España" que pretendía mostrar la riqueza llingüística del país, pero onde l'asturianu nun tuvo presente.
Pa Marta Mori, ganadora de los premios de poesía Teodoro Cuesta y Xuan María Aceval, ye "mui positivo" que l'Institutu Cervantes collabore nel espardimientu de la diversidá llingüística d'España. "Sicasí, ye de llamentar qu'una institución académica d'esti altor siga considerando llingües namás a les que tienen l'estatus xurídicu de la cooficialidá", afirmó la vicepresidenta de l'Academia de la Llingua.
Mori diz qu'esta "reducción", amás d'escluyir a "escritores de calidá probada", implica "una confusión ente los conceptos de llingua propia y llingua oficial, que ye como subordinar los criterios comunicativos y culturales a criterios de calter político-alministrativu", polo que señala que nun entiende como nun s'incluyó nel recital nengún poeta en llingua asturiana.
Per otru llau, Pablo Texón, ún de los autores n'asturianu más valoraos pola critica, diz que l'actu del Cervantes muestra "bona voluntá" y son bien interesantes les voces que nel se pudieron sentir. Sicasí, esplica que les ausencies d'asturianu, aragonés y aranés "rescamplen bien d'ello y nun parez que la non oficialidá de les dos primeres sirva d'escusa, sinón más bien de demostración de falta d'altura de mires".
Con too, l'escritor de Felechosa recuerda que'l principal oxetivu del Institutu Cervantes ye'l de promocionar el castellanu. "Tampoco hai que lo escaecer", sentencia.
