UVIÉU, 17 de Payares (EUROPA PRESS)
La conseyera de Bienestar Social y Vivienda del Gobiernu del Principáu, la socialista Esther Díaz, anunció esti llunes que dexa'l cargu. "Nun quiero ser una torga", dixo, antes de llamentar que la sometieren a "un escarniu públicu". "Podré equivocame, pero nun soi una corrupta", afirmó.
Díaz fizo pública la so decisión na Comisión de Presidencia de la Xunta Xeneral del Principáu d'Asturies (XXPA), onde compareció a pidimientu propiu pa informar sobre la so relación cola empresa Davelco SA, subcontratada por empreses constructores en delles obres públiques.
Esther Díaz, dixo que va presentar "darréu" la so renuncia al presidente autonómicu, Javier Fernández, pa dexar de ser "blancu fácil" de crítiques qu'estropien al Gobiernu asturianu o al PSOE. Sicasí, aseguró que "nun incumplió la llegalidá vixente y defendió la so actuación tresparente".
Díaz, la primer conseyera asturiana que dimite nesta llexislatura, aseguró que "nunca" tapeció nin camufló'l so patrimoniu, nin utilizó "falcatrúes llegales pa escondelo". Amás, remarcó que "nunca hubo reparos "nin se pidieron aclaraciones sobre posibles incompatibilidaes" na so declaración de bienes y patrimoniu.
"Vini equí a esnudame de manera metafórica", aseguró mientres la so comparecencia, na que llamentó'l dañu que se fizo nos últimos díes "al bon nome d'empreses" y a la so trayectoria política que, caltién, "tuvo marcada pola honestidá".
MARCHA COLA "CONCIENCIA TRANQUILA"
Esther Díaz aseguró que marcha "cola conciencia tranquila" dempués de 22 años como afiliada al PSOE y de ser alcaldesa de Llangréu y conseyera de Bienestar Social y Vivienda, remarcando la so "fuerte vocación política" y la so actuación "de bona fe". "Nun frayé la llei nin intenté tornala", resaltó, llamentando que, sicasí, yá se dictó "veredictu" pa la so "deshonra" y la condenaron "a pena de picota".
Díaz, que tuvo palabres d'agradecimientu pa Javier Fernández, defendió la so "actuación tresparente" tanto na so xestión como altu cargu de l'alministración llocal y autonómica como na declaración del so patrimoniu, qu'inclúi un 19,8% de les acciones de la empresa Davelco.
"Nunca entemedié, presioné nin beneficié a empreses", aseguró alvirtiendo de que les normes futures "nun vinculen xurídicamente porque nun existen". D'esta manera, resaltó que'l proyectu de Llei de Bon Gobiernu --nel que reserva'l criteriu d'incompatibilidaes hasta porcentaxes del 10% de participación n'empreses con contratos públicos, subcontrates o entidaes sovencionaes-- entá nun s'aprobó nel parlamentu autonómicu y poro, la que vixente ye la norma de 1995. Al respecto, repitió que nun incurrió n'incompatibilidaes nin nadie-y alvirtió sobre esa posibilidá.
FIXACIÓN DE POSICIONES
Dende UPyD, el diputáu Ignacio Priendes, nun punxo en duda que Díaz nin incurriera n'incompatibilidaes nin seya una corrupta, pero caltién que "sí s'equivocó". "La dimisión yera la única salida que-y quedaba porque podría incurrir nuna falta grave d'incompatibilidá", apuntó Prendes, pal que "la ética y la estética tienen que dir pareyes pa ofrecer exemplaridá", de la que criticó "el silenciu atronador" per parte de Javier Fernández.
Pal voceru d'IU, Aurelio Martín, Esther Díaz compareció más como xurista que como conseyera. "En política nun basta con ser llegal", remarcó'l diputáu d'IU parafrasiando al presidente asturianu, al empar que "matizó que naide la acusó de corrupción nin de tráficu d'influencies". "Tienen que buscase meyores práctiques qu'avienten cualquier sospecha y garanticen la exemplaridá", encamentó.
El diputáu del PP Fernando Goñi mostró la so preocupación polo asocedío, apostando por reforzar mecanismos de control de cara al futuru. Asina, anunció que dende'l PP van proponer constituyir una comisión que vele pola bona práctica del exerciciu tanto de los diputaos como del Executivu.
La vocera de Foru Asturies, Cristina Coto, considera que Javier Fernández nun tendría que permitir el nomamientu d'Esther Díaz en conociendo la so declaración de bienes y patrimoniu. "¿Por qué toleró esto?", preguntóse, reprochando "falta de coherencia coles llecciones d'ética que va dando".
Asina, Coto entiende que'l presidente tuviera que cesala antes, remarcando que la conseyera nun negó les informaciones publicaes sinón que la so defensa centróse en "cuestiones irrelevantes", como que taba casada en réxime de separación de bienes, que nun participó en meses de contratación o que Davelco actuó como subcontrata.
Pela so parte, la diputada socialista Judit Flórez punxo en valor "l'exemplu" que dio Esther Díaz "dende la coherencia, la tresparencia y la responsabilidá" na so comparecencia. La parlamentaria, que dixo nun compartir algunos de los argumentos de los otros grupos, matizó que "un proyectu de llei nun ye vinculante".
"Existe un nivel d'esixencia bien altu, pero dio un nivel de respuesta tan altu qu'algunos deberíen avergoñase poles sos acusaciones, cuando nun hubo actividá illegal", argumentó. "La so trayectoria y actitú hónrenla. Munches gracies y muncha suerte", acabó.
A lo último, Esther Díaz quiso matizar delles declaraciones de los grupos, mostrándose especialmente crítica colos reproches contra Javier Fernández. Asina, dixo que nun va consentir que se ponga en duda l'actuación del presidente, qu'atendió'l so pidimientu d'orientar les sos comparecencies, tanto en rueda prensa como en sede parlamentaria, pa dar esplicaciones y defender la so honradez hasta anunciar la so dimisión.
