UVIÉU, 25 de Febreru (EUROPA PRESS)
Una manifestación d'estudiantes percorrió esti miércoles el centru d'Uviéu n'oposición a la política educativa del Gobiernu de Mariano Rajoy y bien especialmente contra la reforma planteada del sistema d'universidaes que pretende amenorgar a trés años la duración de los títulos, continuaos con dos años d'especialización en másteres.
La movilización taba convocada pol colectivu Asamblees d'Estudiantes de la Universidá d'Uviéu y por Comisiones Obreres, y coincidía cola primer xornada de la güelga convocada pol Sindicatu d'Estudiantes. Los sos representantes tamién tuvieron presentes na marcha.
Partieron a les 18.30 de la Estación de Renfe y percorrieron el centru d'Uviéu, encabezaos por una pancarta col lema en llingua asturiana: "Non más esperimentos na universidá pública". Ente les conseñes glayaes, "Pública y de calidá" y "Ministru'l que nun bote" fueron dalgunes de les más siguíes polos asistentes. La manifestación acabó dientro del Edificiu Históricu de la Universidá d'Uviéu.
El voceru de les Asamblees, Álvaro Villegas, mostróse confiáu en qu'esta movilización seya "un golpe" enriba la mesa pa evitar que'l Gobiernu central "siga faciendo reformes d'espaldes a la comunidá educativa". "Cualquier movilización paezmos respetable dafechu y vamos apoyala siempre", afirmó al respective de la güelga del Sindicatu d'Estudiantes, convocatoria que'l so colectivu nun secundó oficialmente.
En representación de CCOO taba presente Ignacio Loy, que destacó tamién el siguimientu de la güelga, y mostró'l so enfotu en que "la comunidá educativa reaccione porque esti decretu pue parase". Refugó l'argumentu "zorramplu" del aforru de les families, porque "significa dos años más de máster y el másteres cuesta'l doble". Recordó amás que'l 30% de los graduaos en másteres provienen de másteres privaos, polo que'l decretu supón "mayor volume de negociu pa la enseñanza privada".
Pela so parte, la representante de Suatea tamién felicitó al Sindicatu d'Estudiantes pol "éxitu atayante de la güelga". Cree qu'hai que dar "tola respuesta posible al decretu", y criticó a la Conseyería d'Educación por "aplicar a raxatabla" toles normatives del Gobiernu central. Echó en falta dalgún tipu d'oposición per parte del Gobiernu autonómicu y consideró insuficiente'l pidimientu de los rectores d'aplazar la puesta en marcha de la reforma.
