MADRID, 7 d'Ochobre (EUROPA PRESS)
L'ex edil del PP n'Alegría (Álava) Rodrigo Sanz 'Joseba', que se sumó a la llucha de los curdos contra l'Estáu Islámicu (o DAESH) en Siria, relató que tanto él como cualquier combatiente "siempre" guarden dalguna granada o una bala pa que los terroristes nun los garren "vivos".
Según dixo, l'Estáu Islámicu ufierta 150.000 dólares pela cabeza de cualquier miembru de los 'Lleones de Rojava' o de cualquier combatiente estranxeru. "Apaecer nun videu onde a la fin te degüellen ye pa ellos publicidá y más publicidá pa que más asesinos vengan equí a matar a más xente", esplicó.
Sanz ta integráu na unidá 'Lleones de Rojava', una organización formada por combatientes internacionales col oxetivu de frenar l'avance del Estáu Islámicu na zona curda de Siria. "Si nun los paramos equí, tenémoslos en casa, yá los tuvimos en casa y eso hai que tenelo en cuenta", narró nuna entrevista na Cadena Cope recoyida por europa Press.
Los 'Lleones de Rojava', según contó, reciben l'apoyu loxístico y armamentístico de les Unidaes de Protección Popular (YPG), les fuerces curdes en Siria. "El PKK (el Partíu de los Trabayadores del Kurdistán) son los que tán consideraos terroristes, los YPG nun tán consideraos terroristes, los YPG protexen a los pueblos y a les ciudaes", remarcó. Ye más, precisó que Turquía ataca al PKK, pero non a los YPG.
Según dixo, él dedícase a "ayudar al avance" y a la población civil "pa evitar que DAESH entre nos pueblos o nes cases", onde "entren a sangre y fueu, acaben con too y maten a tol mundu".
ESTÁU ISLÁMICU YE "MUI COBARDE"
Sicasí, afirmó que nun arriesgó la so vida "tanto como se diz" porque l'Estáu Islámicu "namás sabe poner coches bomba" y ye "bien cobarde" nel combate. "De priemres ye bien cobarde, lo que sabe ye poner coches bomba pero cuando se tien qu'enfrentar de frente son unos cobardes", recalcó.
Na so opinión, pa resolver la situación en Siria "lo que tenía qu'haber son coaliciones internacionales, dexar de bombardiar". "Dacuando bombardien los americanos y los franceses, los rusos tán más pela zona de Damascu", relató 'Joseba'.
L?ex conceyal vascu espresó'l so deséu de volver a España: "Yo quiero volver porque la mio muyer nun ta bien", argumentó 'Joseba' añadiendo que de lo contrario quedaría en Siria. "Vuelvo porque la mio muyer precísame sinón quedaba equí ayudando a la xente", dixo.
Pa poder tornar a España, abrió una cuenta na plataforma PayPal pa recaudar al traviés d'ella dineru bastante pa facelo. "Nun toi pidiendo caridá", esclaró añadiendo que nun quier que les instituciones "lu garren".
"Nunca debí nada a naide tando de conceyal nel mio pueblu, nun quiero que me digan que debo nada a nengún políticu porque me van a utilizar", esplicó.
