UVIÉU, 30 de Xineru (EUROPA PRESS)
Los expresidentes d'Hunosa Luis Manuel Tejuca y Juan Ramón García Secades coincidieron esti vienres en negar irregularidaes na xestión de la empresa pública nin la existencia d'aportaciones de 400.000 euros pa la celebración de la fiesta minera de Rodiezmo, como apuntaren dellos comparecientes en sede parlamentaria. De la mesma, dicen desconocer el posible orixe de la fortuna tapecida de Villa.
Asina lo apuntaron mientres la sesión d'esta mañana de la comisión d'investigación na Xunta Xeneral sobre la xestión n'Asturies de los Fondos Mineros y la supuesta fortuna tapecida del exsecretariu xeneral del SOMA y exparlamentariu socialista José Ángel Fernández Villa y, en concreto, sobre les dietes percibíes por Villa como miembru del Conseyu d'Alministración d'Hunosa, según sobre'l papel desempeñáu por Villa y los sindicatos mineros na xestión de la hullera pública.
En concreto, l'expresidente d'Hunosa ente 1996 y 2004 y del so Conseyu d'Alministración, Luis Manuel Tejuca, remarcó que na empresa pública "nun hubo irregularidaes nin existía pagos en 'b'", apuntando que desconoz el posible orixe de la fortuna de Villa anque sospecha que nun provien de los Fondos Mineros.
"Siempre se mostró austeru. Nun acudía a les comíes del conseyu d'alministración que se celebraben tolos meses, mientres que tolos demás diben", comentó. Igualmente, destacó que "los sindicatos teníen muncha fuerza n'Hunosa y en tola minería", pero Villa "nunca" intentó influyir nes sos decisiones. "A mi nun me punxo Villa, punxéronme Aznar y Piqué y diome'l preste Cascos, y tampoco me quitó Villa, quitóme'l Gobiernu de Zapatero", remarcó en referencia a los executivos centrales de José María Aznar y José Luis Rodríguez Zapatero.
Tejuca esplicó que los conseyeros d'Hunosa cobraben na so etapa 140.000 pesetes por caúna de les 11 xuntes qu'había al añu. Coles mesmes, tocantes a les dietes por desplazamientu y comíes del Comité Intercentros, reconoció que mientres cerca de 20 años los pagos ficiéronlos a los sindicatos en llugar d'a los asistentes. Nel casu del SOMA, Tejuca coincidió con anteriores comparecientes al asegurar que'l pagu fízose con un cheque nominal a nome de Villa "porque yera'l secretariu xeneral, nun se-y diba dar al conserxe".
"Nun conozo nengún sindicalista tontu, y menos na minería. Que sabíen que se pagaba al so nome, seguro; que nun s'atrevieren a pidi-ylo porque-y teníen mieu ye otra cosa, pero ehí nun entro", ironizó. Asina, dixo desconocer cómo yera la xestión interna d'esos pagos nel sindicatu, remarcando que lo suelto nun-y importaba "cuando tenía que recudir los miles de millones" de perda d'Hunosa. Sicasí, matizó que nel 2001 decidió modificar esa forma de pagu porque nun-y prestaba.
NIEGA FINANCIACIÓN A RODIEZMO
Tejuca, qu'apuntó que Villa dexó de trabayar en cayéndo-y una caxa de sidra nel llombu mientres la fiesta minera de Rodiezmo, negó que, como se comentó en sesiones anteriores, la celebración recibiera una financiació de 400.000 euros per parte d'Hunosa.
Pela so parte, el que foi presidente d'Hunosa y del Comité d'Alministración de la hullera pública ente'l 2004 y el 2012, Juan Ramón García Secades, esplicó que mientres la so etapa había 13 persones y dos o trés asesores por grupu nel Comité Intercentros, indicando que Villa "nun yera miembru del Comité pero asistía como asesor". Amás, modificó los métodos de cálculu de les dietes pa evitar "disfunciones", destacando que'l "sistema de pagu per tresferencia" facíase dende'l 2001.
Tamién calcó en que "Hunosa ye una empresa bien fuertemente sindicalizada", reconociendo que pa los xestores ye una "incomodidá" pero tien "la ventaya" de que los trabayadores secunden los acuerdos algamos ente la empresa y los sindicatos. "Utilizábamos l'acuerdu como métodu de trabayu", aseveró, añadiendo que nunca se sintió influyíu por Villa "nin por naide".
"Nin la más remota idea", llendóse a dicir sobre'l posible orixe de los 1,4 millones d'euros que presuntamente Villa tapeció a Facienda ya investiga la Fiscalía Anticorrupción. "Pasamos de la sorpresa absoluta y el plasmu a la indignación", almitió, cola confianza de que los procesos abiertos s'esclaren. "Les cuentes d'Hunosa son tresparentes dafechu", defendió.
Ello ye qu'al respecto de la fiesta de Rodiezmo, Secades coincidió col so antecesor en qu'Hunosa nun entregó 400.000 euros como apuntaron dellos comparecientes: "Esa cifra nun sé en cuántos años sería porque nun añu ye imposible". "Los 400.000 euros yo nun los autoricé nunca", atayó.
