MADRID, 4 Ago. (EUROPA PRESS) -
Facua-Consumidores n'Aición interpunxo denuncies escontra les tres principales compañíes eléctriques (Iberdrola, Endesa y Gas Natural) nos últimos meses por penalizar a usuarios por supuestes manipulaciones nos contadores.
Nun comunicáu, l'asociación señala que la Consellería d'Industria de la Comunidad Valenciana yá-y dio razón nes siete primeres resoluciones sobre les reclamaciones presentaes escontra Iberdrola por nun existir pruebes abondes d'esa manipulación, polo qu'obliga a la eléctrica a rectificar.
Asina, encamienta a los usuarios que seyan víctimes d'estes falses acusaciones a que "denuncien los sos casos énte les autoridaes d'Industria de les sos comunidaes autónomes".
Amás, reclama que s'abran espedientes sancionadores a les compañíes eléctriques qu'incidan nestes práutiques, "por mor de la gravedá de les acusaciones ensin fundamentos feches a numberosos usuarios".
Según Facua, nos casos resueltos pola Consellería d'Industria de la Comunidad Valenciana, Iberdrola pretendía aplicar l'artículu 87 del Real Decretu 1955/2000, de 1 d'avientu, que dexa recalcular la factura de la lluz si comprobar qu'esistió manipulación nel contador, utilizando como fórmula la potencia contratada por seis hores d'usu diaries nun añu.
