UVIÉU, 16 Feb. (EUROPA PRESS) -
Un fallu informáticu y la falta de personal son les dos xustificaciones que'l conceyal d'Economía del Conceyu d'Uviéu, Rubén Rosón, mentó esti vienres en rueda de prensa en relación cola posible suspensión de la VI edición de la Convención de cultura y ociu alternativu: 'CometCon'.
Esti xueves, la organización del eventu anunció la posible cancelación del congresu fecháu pa la fin de selmana de'l 23, 24 y 25 de marzu pola "inactividá" del Conceyu d'Uviéu no que se refier al pagu d'una subvención del añu pasáu cola asociación promotora del eventu pa la so financiación, por una cantidá que xube a la cifra de 120.000 euros.
Los organizadores, Hector Lasheras y Claudia Da Fonseca, indicaron que tienen solicitáu un creitu por valor de 108.000 euros pa sufragar los gastos de la edición anterior, préstamos qu'entá se ta pagando mentes esperen l'abonu de la subvención pendiente.
Según esplicó'l conceyal d'Economía, la diferencia de la subvención ente anguaño y los anteriores ta en que "anguaño ye subvención directa". Asina, el departamentu d'Intervención realizó un requerimientu sobre la xustificación presentada al departamentu d'Economía sobre esa subvención. "Dalgo mui avezao", indicó.
El problema ta en que l'espediente perdióse nel "llimbu informáticu" enantes de llegar al departamentu d'Intervención. Según indicó'l conceyal, llegóse a un compromisu pa que l'espediente tea cerráu la selmana que vien. D'esta manera, si Intervención da'l vistu bonu enantes del 25 de febreru, el llunes 26 los organizadores de 'CometCom' van recibir la subvención.
