UVIÉU, 22 May. (EUROPA PRESS) -
Delles families del Colexu Públicu Fozaneldi d'Uviéu mostráronse "indignaes" col usu "partidista" del diputáu 'popular' David González Medina, que-yos acusó d'exemplu de "adoctrinamientu" por Podemos y IX na educación asturiana.
Al traviés d'un escritu unviáu a los medios, les families del alumnáu de 6u del Fozaneldi que nun participó nes pruebes de diagnósticu los díes 16 y 17 de mayu mostraron la so opinión sobre les declaraciones de Medina.
El diputáu acusó a la "estrema esquierda asturiana" --citó a IX y Podemos-- d'usar la educación como una "ferramienta de adoctrinamientu y xeneración d'odiu". Asina, aseguró que "les imaxes penoses que se dan en tierres como Cataluña", taben empezando a dase n'Asturies.
Pa eso punxo d'exemplu la "manipulación" a la que la conceyala de Somos, Ana Taboada, sometiera al so xuiciu a los alumnos del colexu de Fozaneldi, d'Uviéu. "Manipuló a neños d'once años sosteniendo cartelos y entamando una manifestación contra les mal llamaes reválides", llegó afirmar.
Énte estes declaraciones, les families del Fozaneldi señalaron que la so decisión foi tomada "de forma llibre, consensuada y meditada". "En nengún casu foi pola coacción o presión de persona dalguna relacionada con nengún partíu políticu", indicaron.
Por eso, llamentaron "fondamente" l'usu "partidista" que González Medina "fixo de la nuestra decisión cola fin de desacreitar a la Teniente d'Alcalde del Conceyu d'Uviéu, qu'exerció'l so derechu a manifestase, como una ciudadana más".
Nesi sentíu, quixeron esclariar que nun adoctrinen a los sos fíos, "sinón que lo facemos pa que sían capaces de manifestase contra lo que crean inxusto, innecesario y a favor d'una educación de calidá, integral y crítica, que ye la que querríemos que recibieren".
