UVIÉU, 23 Feb. (EUROPA PRESS) -
El presidente del Principáu d'Asturies, el socialista Javier Fernández, manifestó esti vienres que'l Gobiernu asturianu asume como propies les reivindicaciones del próximu 8 de marzu y mostróse convencíu de que la convocatoria va ser "too un éxitu".
"El Gobiernu va tar coles reivindicaciones del 8 de marzu y amás vamos siguir esforciándonos, como facemos agora, en lluchar contra la resquiebra de xéneru, la resquiebra salarial y pola igualdá", dixo Javier Fernández en respuesta a una entruga del portavoz de Podemos, Emilio León, sobre la postura del Executivu sobre'l 8 de marzu.
Sicasí'l presidente asturianu indicó qu'eses reivindicaciones feministes "nun les lidera nenguna organización política y nun convién que naide se ponga nenguna medaya". "Esto ye otra cosa, ye tresversal y ye distinta. Nun debemos de capitalizar el mensaxe dende nenguna organización política", alvirtió'l presidente asturianu.
Asina, sobre l'encamientu de Podemos de que se ponga a trabayar en favor de les muyeres, manifestó que "los gobiernos nun se ponen nunca en fuelga" y aseguró que lo que si van facer esi día ye participar nel actu institucional porque los conseyeros nun van tener nengún actu más n'axenda.
Añadió que la política "nun ye maxa, ye facer coses" y recordó que foi un gobiernu socialista'l que promovió la llei d'Igualdá, la llei contra la violencia de Xéneru o'l Plan estratéxicu d'Igualdá n'Asturies, ente otres midíes.
"Somos una de les 5 comunidaes que cuenten con un observatoriu contra la violencia de xéneru, nun recurtiamos fondos na llucha contra la violencia de xéneru", dixo Javier Fernández que nomó más midíes d'esta índole pa defender el trabayu del so Executivu.
Abogó tamién por combatir "día ente día y con trabayu y polítiques" la resquiebra salarial y anunció la collaboración próxima con sindicatos y empresarios con esti fin y animó a denunciar cualquier discriminación salarial.
Per otru llau, Emilio León indicó que les respuestes polítiques topeten cola situación real y destacó les cifres que muestren la situación real, de manera concreta nel Principáu d'Asturies, onde existe una amplia resquiebra salarial.
Llamentó que los que nun quieren falar de resquiebra salarial entren "de cabeza" si se fala de la palabra portavoza. "Nun-yos fadien les palabres nueves ye que tampoco-yos gusten les vieyes, como fuelga o feminista", manifestó.
Asina, León defendió lo fuelga feminista del 8 de marzu próximu y pidió el Gobiernu asturianu que se ponga del llau de les muyeres. "Usté lo que tien que facer el 8 de marzu nun ye ponese en fuelga ye ponese a trabayar", encamentó al presidente asturianu.
