BONOS AIRES, 27 de Xineru (EUROPA PRESS)
La presidenta d'Arxentina, Cristina Fernández de Kirchner, anunció esti llunes, na so primer apaición pública tres la muerte del fiscal Alberto Nisman, que'l so Gobiernu va proponer a los llexisladores arxentinos un proyectu de llei pa disolver la Secretaría d'Intelixencia, según informó'l diariu 'Clarín'.
"Esti proyectu va enviase antes d'esti fin de selmana y va llamase a sesiones estraordinaries", detalló la mandataria arxentina, que prevé sustituyir esti organismu por una Axencia Federal d'Intelixencia, que "va trabayar na prevención d'amenaces internacionales provenientes del terrorismu, el narcotráficu, trata de persones y los ciberdelitos".
"Hai qu'empezar a trabayar por un proyectu de reforma del sistema d'Intelixencia arxentín, dao que l'actual nun sirvió a los intereses nacionales", añadió la presidenta, qu'esplicó que la nueva Axencia Federal d'Intelixencia va caltenese nel ámbitu del Poder Executivu, pero "va requerir del Senáu pa poder funcionar".
Esta decisión llega dempués de que l'oficialismu apuntara a ex axentes d'Intelixencia de maniobres contra'l Gobiernu. Ello ye que l'Executivu apartó n'avientu a la cúpula del serviciu secretu. "La disolución de la Secretaría d'Intelixencia ye una deuda de la democracia que me toca a mi reformar", repostió Fernández, qu'apaeció sentada sobre una siella de ruedes, recuperándose d'un esguince de todíu.
