UVIÉU, 25 d'Abril (EUROPA PRESS)
L'últimu informe de la Policía Científica sobre l'incendiu del númberu 58 de la cai Uría (Uviéu) --que costó la vida al bomberu Eloy Palaciu y nel qu'un compañeru resultó firíu-- contién unes conclusiones en materia de xestión de la quema que son "de calter personal" y nun tán basaes n'actuaciones periciales.
Asina consta nel escritu de Fiscalía del Principáu d'Asturies que considera que nun hai razones p'abrir la causa y al que tuvo accesu Europa Press. El documentu enviáu pol fiscal al Xulgáu tovía nun trescendiera. A pesar de llevar fecha del 19 d'abril, l'abogáu de la familia d'Eloy Palacio, que pidió reabrir la causa tres el nuevu informe policial, reconoció'l vienres 21 d'abril que tovía nun conocía la lliteralidá del testu.
"Nun procede reaperturar les actuaciones, siendo les dilixencies socilitaes manifiestamenete improcedentes", considera'l fiscal Enrique Valdés-Solís ante'l pidimientu.
Respuende asina a la pretensión de reabrir la causa penal tres l'estensu informe de la Policía Científica que trescendió a primeros d'esti mes d'abril y qu'acabó considerando nos llabores d'estinción una falta de supervisión del dispositivu lleváu a cabu polos bomberos y que nun se fizo una valoración apropiada del riesgu de colapsu de la estructura.
El trabayu policial tamién detalla que la falta de suministru d'agua, n'hidrantes y boques de riegu, foi unu de los factores que condicionó los llabores d'estinción de la fatal quema producida'l 7 d'abril del 2016.
"Suponen unes conclusiones sin basase n'actuaciones periciales, sinón de calter personal", retruca'l fiscal tocantes a lo que la Policía Científica apurre sobre la xestión de la quema. "En nengún momentu suplen les algamaes polos xulgadores, máxime cuando nun puen nunca algamar la exhaustividá de la investigación penal", alega amás.
Valdés-Solís esplica que la inexistencia d'infracción penal ye una decisión de los órganos xudiciales y non de los peritos, y que'l mesmu informe de la Policía Científica coincide "nuna cuestión crucial" pa considerar la inexistencia d'infracción penal: la orde d'ataque esterior y l'actuación nun escesu de confianza.
Considera'l fiscal que l'informe de la Policía Científica céntrase en cuestiones que "en nada afecten a la decisión tomada" d'archivar les actuaciones penales. "Nun introduz nengún elementu adicional que permita considerar les decisiones xudiciales dictaes", señala.
No que cinca a les responsabilidaes o consecuencies que pudieren derivase del defectuosu suministru d'agua al traviés de hidrantes, daqué que recueye l'informe, el fiscal señala que "nenguna relación de causalidá tien col accidente llaboral que dio llugar al fallecimientu del bomberu y, poro, nun hai trescendencia nel ámbitu penal".
