UVIÉU, 17 d'Ochobre (EUROPA PRESS)
La Fiscalía d'Asturies archivó les Dilixencies d'Investigación abiertes tres la denuncia de la plataforma Oru Non, que llucha contra la instalación d'una esplotación minera na zona de Salave (Tapia), contra'l conseyeru d'Economía y Empléu, Graciano Torre González, por un delitu de prevaricación.
Según informa'l Ministeriu Fiscal nuna nota prensa, considera que'l denunciáu nun cometió delitu dalgún, dao que de la investigación realizada entiéndese qu'actuó siempre acordies coles indicaciones de los técnicos na materia y non de manera arbitraria. Les Dilixencies d'Investigación entamaron el 5 de setiembre na Estaya Territorial d'Avilés de la Fiscalía.
Na so denuncia, la plataforma consideraba illegal la decisión del conseyeru de nun entamar un espediente sancionador a la mercantil Esplotaciones Mineres del Cantábricu S. L. mientres la campaña de sondeos de zarru de malla, en Salave, col supuestu oxetivu de favorecer a la sociedá.
De les dilixencies practicaes, la Fiscalía considera que nun pue afirmase que l'actuación del conseyeru d'Economía y Empléu puea calificase como constitutiva d'un delitu de prevaricación, nin activu nin pasivu (por omisión), dao que, cuando tuvo conocencia de les denuncies de los presuntos incumplimientos, ordenó l'abertura d'un espediente informativu. Si nun s'abre un espediente sancionador foi porque, acordies coles indicaciones del Serviciu d'Asesoramientu Xurídicu Alministrativu de la Secretaría Xeneral Técnica de la Conseyería d'Economía y Empléu, nun s'acreditó incumplimientu dalgún de los condicionaos a los que tenía qu'axustase l'actuación d'Esplotaciones Mineres del Cantábricu S. L. A última hora, el denunciáu actuó siempre acordies coles indicaciones de los técnicos na materia y non de forma arbitraria.
