GRANADA, 23 d'Agostu (EUROPA PRESS)
La Fiscalía de Granada estudia si va recurrir la decisión del xuez de guardia de dexar en llibertá provisional comunicada y sin fianza a Juana Rivas, la madre que permaneció 27 díes en paraderu desconocíu tres nun cumplir la orde de devolver los sos fíos al padre, condenáu nel 2009 por un delitu de lesiones nel ámbitu domésticu. Podríen volver citala en sede xudicial xunto col proxenitor, Francesco Arcuri, residente n'Italia.
L'autu del Xulgáu d'Instrucción númberu 9 de Granada, en funciones de guardia esti pasáu martes, cuando Juana Rivas compareció ante l'autoridá xudicial tres detenela la Policía Nacional, señala qu'ante'l mesmu cabe recursu de reforma nel plazu de trés díes o d'apelación ante l'Audiencia Provincial de Granada.
Fontes de la Fiscalía informaron a Europa Press de qu'esta decisión pue ser revisable "d'oficiu" en cualquier momentu, sin que decidiera tovía cuál va ser la fórmula escoyida pa recurrir, en casu de qu'asina lo decida'l Ministeriu Públicu, que pidió prisión provisional sin fianza pa Juana Rivas, tres la so comparecencia ante'l xuez de guardia, na que namás respondió a les preguntes de la so defensa.
En casu de que s'opte pol recursu d'apelación ante l'Audiencia Provincial, nun ye preceptiva una vista oral, pero sí pue solicitala cualquier de les partes convocada, ante lo que tendría que citase a Juana Rivas y Francesco Arcuri p'analizar la situación del casu y les midíes que pudieren interesase.
