UVIÉU, 21 d'Abril (EUROPA PRESS)
La Fiscalía del Principáu d'Asturies solicitó esti vienres la clausura mientres dos años del club d'alterne Models, en Siero, y penes de prisión pal so propietariu y encargáu por tener a 32 persones trabayando nel llocal sin tar daes d'alta na Seguridá Social. La vista oral va celebrase esti llunes a les 10.30 hores na Estaya Segunda de l'Audiencia Provincial d'Asturies, con sede n'Uviéu.
En nota de prensa, el Ministeriu Fiscal caltién que nel momentu de los fechos, l'acusáu yera'l propietariu, alministrador y llegal representante de la sociedá unipersonal, sociedá titular y responsable del establecimientu mercantil Club Models, club d'alterne y prostitución asitiáu nel polígonu industrial de Granda, Siero, con llicencia municipal d'abertura pa pensión d'una estrella, cafetería y sala de fiestes. L'otru acusáu yera l'encargáu del club que s'ocupaba de la xestión diaria y del so normal funcionamientu.
El 22 de xineru del 2015, nuna visita realizada al Club Models por miembros de la Inspección de Trabayu y miembros del Grupu Operativu d'Estranxeros de la Policía Nacional, comprobóse que nel establecimientu alcontrábense trabayando como camareres d'alterne 32 persones que nun taben daes d'alta na Seguridá Social, de les que una d'elles taba percibiendo la prestación de desempléu y otra nun tenía la preceptiva autorización alministrativa pa trabayar n'España.
La Inspección de la Seguridá Social manifestó que, nel momentu de la inspección, la plantiya de la empresa yera de 57 y la empresa nesa fecha solamente tenía daes d'alta na Seguridá Social como trabayadores nel establecimientu a 25 persones. Pola Inspección de trabayu diose d'alta na Seguridá Social a toes elles esa mesma xornada, siendo l'únicu día cotizáu, dao qu'esi mesmu día dioles de baxa la empresa.
La Fiscalía considera que los fechos son constitutivos d'un delitu contra los derechos de los trabayadores y solicita que se condene a cada unu de los acusaos a un añu y seis meses prisión y multa de nueve meses con cuota de diez euro día, con responsabilidá personal subsidiaria en casu d'impagu.
Amás, solicita que se condene a la sociedá a les penes de suspensión d'actividaes y clausura del establecimientu Club Models mientres dos años.
