UVIÉU, 13 Sep. (EUROPA PRESS) -
La senadora de Foru Rosa Domínguez de Posada formuló esti martes una entruga al Gobiernu central na sesión de control de la cámara alta pa reclamar l'apoyu económicu del Executivu de Mariano Rajoy a la celebración de los centenarios de la coronación de la Santina, de los Picos d'Europa y de la batalla de Cuadonga.
"Nestos momentos tan difíciles polos qu'atraviesa España, el Gobiernu tien qu'ayudar a los asturianos, que siempre se sintieron arguyosos de la so patria chica pero sobremanera, fondamente españoles", diz la senadora en nota de prensa.
Coles mesmes, señala que presentó una iniciativa pa que'l Gobiernu central incorpore una partida nos Presupuestos Xenerales del Estáu próximos destinada a collaborar na triple celebración, que tien que ser declarada "acontecimientu d'escepcional interés públicu".
"¿Cuál va ser la participación del Gobiernu d'España na organización y desenvolvimientu de los actos conmemorativos de los centenarios del Parque Nacional del Monte de Cuadonga (güei de Picos d'Europa), de la solemne coronación de la Virxe de Cuadonga (patrona d'Asturies) y de la batalla de Cuadonga, que van celebrase en 2018?", preguntó la senadora de Foru.
Coles mesmes, recordó qu'en 2018 "van coincidir simultáneamente n'Asturies el centenariu del primer Parque Nacional declaráu n'España, el del Monte de Cuadonga, que pasó a llamase Parque Nacional de los Picos d'Europa, el centenariu de la solemne coronación de la Santina, y el décimotercer centenariu de la batalla qu'anició'l Reinu d'Asturies, la posterior Reconquista y la devoción mariana nesi paraxe".
