UVIÉU, 15 Mar. (EUROPA PRESS) -
El catedráticu de dialectoloxía de la Universidá d'Uviéu y ex presidente de l'Academia de la Llingua Asturiana, Xosé Lluis García Arias, afirmó que'l siempre va dar apoyu a les persones o entidaes qu'apoyen la oficialidá del asturianu, polo que "si Barbón ta a favor de la oficialidá y el restu nun lo tán, yo toi a favor de Barbón".
L'históricu asturianista, fundador de l'asociación Conceyu Bable en 1974, presentó esti xueves na Universidá d'Uviéu'l 'Diccionariu Etimolóxicu de la Llingua Asturiana', y, a preguntes d'Europa Press, aprovechó pa facer un repasu a la situación actual de la llingua, en metá d'un debate políticu sobre la oficialidá.
Asina, Arias dixo que les más de les veces ve'l debate "con murnia y malhumor", porque se tán discutiendo coses que yá se discutieron hai 20 años y nun se diz nada nuevu". Nesi sentíu, dixo que ye lóxico qu'haya opiniones diferentes sobre un mayor o menor usu del asturianu, pero a pesar d'eses opiniones diferentes, "un asturianu nun pue tar a la contra del idioma de la tierra, aquel que los padres y los güelos tuvieron como elementu de comunicación".
P'Arias, el debate social sobre la oficialidá surde porque la sociedá asturiana "va madureciendo" y que la mocedá ye más favoratible. "Ye la señal del tiempu", indicó. Amás, sobre'l debate internu de la FSA-PSOE sobre esti tema, Arias diz saber "poco", pero esplicó que "si Barbón ta a favor de la oficialidá y el restu nun lo tán, yo toi a favor de Barbón".
Per otru llau, sobre la manifestación del 21 d'abril pola oficialidá, qu'entama la Xunta pola Defensa de la Llingua Asturiana, Arias dixo que'l so "encontu" ta con "toos aquellos que defienden la llingua asturiana y que'l idioma tea presente nuna situación de normalidá".
Asina, sobre'l modelu d'oficialidá 'a l'asturianu', dixo qu'onde ta'l castellanu "tien que tar l'asturianu". "Naide quier negar nada al castellanu, que les dos llingües tean por igual y que la xente escueya", sentenció.
