El Gobiernu va rebaxar la cuota nun 50 por cientu el cursu próximu pa les escueles de 0 a 3
UVIÉU, 21 Mar. (EUROPA PRESS) -
El Conseyu de Gobiernu del Principáu d'Asturies aprobó na so xunta d'esti miércoles el Proyectu de Llei de Creitu Estraordinariu, con un importe global de 111,3 millones d'euros. La conseyera de Facienda y Sector Públicu, Dolores Carcedo, esplicó que tolos proyectos s'analizaron y debatieron col restu de grupos parllamentarios, colo qu'espera un "alcuerdu ampliu" na Xunta Xeneral d'una llei "mui importante para Asturies".
Carcedo señaló na rueda de prensa posterior al Conseyu que'l creitu va distribuise ente inversiones, pa lo que presupuestaron 51,4 millones; la cobertura del Salariu Social Básicu, con 15 millones; y l'amortización de la delda, a la que se destinó 44,9 millones d'euros pa "evitar axustes sobre la mesma prórroga".
El PSOE, partíu qu'apoya'l Gobiernu Asturianu, ta esta llexislatura nuna situación de minoría parllamentaria pola que namás cuenta con 14 de los 45 diputaos de la Xunta Xeneral, colo que precisa l'apoyu d'otres fuercies pa sacar alantre les sos iniciatives llexislatives.
Precisamente esta situación de minoría provocó qu'Asturies nun cuente con presupuestos pa 2018, al nun llograr el Principáu'l consensu necesario pa sacar alantre les cuentes. En situación de prórroga'l conseyeru de Presidencia, Guillermo Martínez, señaló que ye "necesaria dafechu" la Llei de Creitu pa desaniciar les consecuencies d'esta situación.
Asturies cuenta "con menos recursos" por mor del presupuestu prorrogáu, que finalmente xube a 4.213 millones d'euros. Esta cuantía ye "insuficiente pa cubrir les necesidaes d'Asturies" pa esti exerciciu, según Carcedo. A eso hai que sumar la prórroga del Gobiernu Central pola que siguen bloquiaos 116 millones.
Énte esti escenariu, la Llei de Creitu Estraordinariu contempla partíes pa les necesidaes "ineludibles", amás de permitir impulsar inversiones. Los 111,3 millones provienen, per un llau, del mayor marxe d'endeldamientu d'anguaño, por 98 millones, y per otru, de los recursos de los fondos Feader pol importe restante, 13,3 millones d'euros.
Nel apartáu d'inversiones, Carcedo detúvose nel refuerciu de la rede d'escueles de 0 a 3, pa lo que destinaron 2,48 millones d'euros p'ameyorar la so financiación y rebaxar la cuota nun 50 por cientu nel cursu próximu.
Destínense amás 1,57 millones pa encarar los gastos derivaos de les convocatories d'oposiciones de Secundaria y Formación Profesional, y 1,62 millones d'euros pa cumplir colos compromisos de financiación cola Universidá.
En polítiques de territoriu, acútense 17,5 millones pal financiamientu d'actuaciones rellacionaes col mundu rural, onde destaquen los 6.250.000 euros pa la prevención de quemes y otros 500.000 euros pa desaniciar los efectos de les quemes del añu pasáu. Ente'l creitu y la prórroga destínense en 2018 más de 14 millones d'euros a la llucha contra quemes.
No que se refier a inversiones pa la renovación tecnolóxica, destínense 5,45 millones, lo que va suponer que pa 2018 va disponer de 16,6 millones pa encarar el Tresformamientu Dixital del Principáu d'Asturies 2017-2022, ente otres actuaciones.
Nel capítulu d'infraestructures, la llei acuta 7,4 millones d'euros pa obres en carreteres, puertos y equipamientos hidráulicos. Otros 2,89 millones tienen como destín la meyora de centros sanitarios mentes qu'una partida de 1,39 millones va dir pa centros educativos, que se van concentrar principalmente nos institutos de La Corredoria, La Fresneda, La Florida y el IES Rei Pelayo de Cangues d'Onís. P'actuaciones en sedes xudiciales, el proyectu de llei acuta 600.000 euros.
De los 51,4 millones d'euros d'inversiones, 27,6 tán condicionaos a la recepción de la parte de les entregues pol sistema de financiación qu'a día de güei Asturies nun recibió por un importe de 116 millones. "El proyectu de llei de financiación establez un mecanismu pol que, si a 15 de setiembre'l Principáu nun recibiera una comunicación nueva de les entregues perriba de la notificiación en xineru, procederíese a afacer el gastu correspondiente a 2018 d'estos proyectos nel importe necesario pa garantizar la cobertura de los gastos derivaos la delda", esplicó Carcedo.
TOLOS PARTÍOS "VAN VESE IDENTIFICAOS"
El proyectu de creitu, esplicó Carcedo, cuenta con proyectos que foron "analizaos y debatíos con tolos grupos", colo que'l Gobiernu espera un "alcuerdu ampliu" na Xunta. Asina, la titular de Facienda señaló que "toos y caún de los grupos van vese identificaos en delles de les midíes".
Per otru llau, Martínez esplicó qu'una vez aprobada pol Conseyu, la Llei "va rexistrase de manera inmediata" pa la so tramitación parllamentaria. Sicasí, la llei nun va poder debatise, polo menos, hasta la segunda selmana d'abril, al suspendese la primer sesión plenaria del mes.
Carcedo esplicó que'l Gobiernu va plantear la tramitación por urxencia y llectura única del Proyectu, pa da-y la mayor axilidá y disponer del dineru cuanto enantes.
"Toos somos mui conscientes de la importancia d'esta llei y tamos seguros de que la tramitación va ser d'acordies con esti fechu", señaló Martínez.
Per otru llau, Carcedo esplicó que "les conversaciones siguen abiertes" pa tratar cuestiones que nun afecten directamente al creitu estraordinariu y sí a la prórroga. Refirióse asina a actuaciones que puen impulsase dende los recursos de la prórroga al traviés de cambios, rellacionaes con autónomos, reforciar l'apoyu a centros tecnolóxicos o préstamos a llabradores.
