UVIÉU, 26 Oct. (EUROPA PRESS) -
El director xeneral de Planificación Llingüística y Normalización del Principáu, Fernando Padilla, afirmó que'l programa de gobiernu del Executivu al que pertenez fala de dar un impulsu a la normalización y que, nesi sentíu, "la toponimia ye una parte fundamental". "Esto nun ye namás qu'aplicar lo que diz la Llei d'Usu, qu'establez que los topónimos d'Asturies tienen que tener la so denominación oficial d'alcuerdu cola so forma tradicional", indicó.
En declaraciones a Europa Press, el director xeneral afirmó qu'asina se recueye na llexislación vixente y nel programa de política llingüística que presentó'l conseyeru d'Educación y Cultura, Genaro Alonso, "y dende que principiamos esta llexislatura yá hubo 13 sesiones de la Xunta Asesora de Toponimia énte les siete qu'hubo nes dos anteriores".
Asina, nos últimos díes publicóse nel BOPA'l decretu de Candamu y Tinéu y tán yá pa tratar nel Conseyu de Gobiernu Peñamellera Alta, Sotu'l Barcu y Tapia. Amás, tamién tán nes fases últimes del procesu Castropol, Llanera, Santiso d'Abres, Villayón, Cuaña, Peñamellera Baxa, Cuideiru, Somiedu, Les Regueres, Uviéu, Onís, Cabrales, Caravia, Salas, Ibias y Ayande
Otra manera, queden cuatro Conceyos por solicitar l'apertura del espediente. Son Navia, Pravia, Muros y Eilao "y polo que sé, van solicitalo nos próximos díes y con ellos yá taríen tolos conceyos", esplica Padilla.
Per otru llau, dende l'añu pasáu, el Conceyu d'Uviéu tien nes sos manes el primer dictamen toponímicu de la Xunta de Toponimia, "sicasí, Uviéu ye un conceyu mui grande, con un espediente bien ampliu, polo que lleva tiempu estudialo", indicó, p'añadir que la selmana pasada yá llegaron a la Conseyería les alegaciones, "que ye'l pasu siguiente".
"Nes xuntes próximes de la Xunta de Toponimia van estudiase eses alegaciones y va dase una respuesta al Conceyu", afirma Padilla, que recuerda qu'aprobar la toponimia ye un procesu de negociación y nél intenten un "alcuerdu total".
A pesar del reblagu que tán dando dende'l Gobiernu asturianu al procesu, el director xeneral señala que nun va dar "tiempu material" a completar la oficialización de la toponimia de tolos conceyos nesta llexislatura. "Con too, hai que tener en cuenta l'impulsu grande que tamos dando, porque no que queda d'añu van ser cuatro o cinco oficializaos y no que queda de llexislatura pue qu'haya 12 más. Ye dicir, un 50 por cientu de lo que quedaba", indicó.
Per otru llau, sobre una supuesta polémica col topónimu de Cuideiru recoyida por dalgún mediu de comunicación, Fernando Padilla afirma que son coses "que suelen pasar". "Como ye dalgo polémico siempre hai medios de comunicación que-yos dan espaciu por dellos motivos", afirma, p'añadir que Cuideiru ye un nome "qu'existió y existe".
"Ta recoyíu na tradicción oral y asina lo recoyeron los encuestadores y, d'alcuerdu cola llegalidá vixente, lo qu'hai que facer ye recuperar los topónimos tradicionales, anque en dellos casos pue llegase al alcuerdu d'aceptar un topónimu billingüe", esplica.
Per otru llau, sobre'l casu de Tinéu, onde l'alcalde de la localidá afirmó que diba siguir utilizando la forma 'Tineo' a pesar de que'l decretu oficializa namás la forma tradicional 'Tinéu', Padilla opina que nun cree que l'alcalde tenga la intención de nun respetar los topónimos oficiales, "porque ye una persona respetable que cumple cola llei".
"Imaxino que va haber que falar d'ello, porque igual entendieron mal el procesu de recuperación de la toponimia tradicional. Si tienen que convivir los dos términos, convivirán, habrá que llegar a un alcuerdu", afirma, p'añadir que lo que fixo la Xunta de Toponimia, "según lo que marca la llei", foi proponer unos topónimos y negocialos col Conceyu.
"Nun sé si'l Conceyu entendió qu'una vez aprobada la toponimia tradicional, esta siguía conviviendo cola anterior, pero nun ye asina y la llei ta clara. Con too, de xuru qu'hai manera d'igualo", esplica'l director xeneral.
Sobre les midíes próximes a tomar nel procesu de recuperación de la toponimia asturiana, Padilla indica que la Dirección Xeneral de Planificación Llingüística y Normalización ta iguando la so páxina web y nella va incluise una aplicación pa poder consultar tolos topónimos tradicionales d'Asturies, "sobre too, los oficializaos".
Amás, indica qu'hai una "campaña constante" d'usu de la toponimia, "porque la llei asina lu marca". "Ye verdá que cuesta trabayu polos vezos y qu'hai que dir pasín a pasu cambiando la cartelería, pero ye una constante dende qu'echó andar la Xunta de Toponimia", afirma Padilla, qu'indica que nun ye "d'un día pa otru" pero que poco a poco se va oficializando y empleando la toponimia asturiana.
