UVIÉU, 26 de Payares (EUROPA PRESS)
El conseyeru de Presidencia y vocera del Gobiernu del Principáu d'Asturies, Guillermo Martínez, pidió al Ministeriu d'Industria que se responsabilice de les sos "acciones" no relativo a la situación actual de la factoría avilesina d'Alcoa, dempués de la puya eléctrica.
Mientres la rueda prensa posterior al Conseyu de Gobiernu celebráu esti miércoles, Martínez calificó como "inaceptables" les manifestaciones del ministru, José Manuel Soria, sobre Alcoa. Nelles, Soria aseguraba que la situación d'Alcoa "depende de la mesma empresa". Estes declaraciones "súmense a la llista de graves irresponsabilidaes protagonizaes por Soria", respondió Martínez.
Por ello, el Gobiernu socialista va encamentar al Ministeriu y a la Secretaría d'Estáu d'Enerxía articular "los mecanismos pertinentes" pa dar solución al problema enerxéticu n'España. En concreto, solicitaron un pactu d'Estáu pola enerxía porque la situación actual "castiga tanto a industries como a consumidores domésticos".
"Ye necesaria una planificación que garantice'l preciu, el serviciu, la estabilidá xurídica y la sostenibilidá medioambiental, el Gobiernu tien que trabayar nesto", esplicó. "Lo que nun ye almitible ye desabrise como fizo ayeri'l ministru, nun ye tolerable", criticó.
Sobre la situación d'Alcoa, el voceru del Executivu asturianu mostróse confiáu en qu'haya "marxe bastante" p'algamar una solución.
