UVIÉU, 23 de Marzu (EUROPA PRESS)
La conseyera de Facienda y Sector Públicu, Dolores Carcedo, manifestó que tien prevista una xunta pa esti vienres col PP na que va zarrase l'anteproyectu de llei pa revisar l'impuestu de Socesiones. A partir d'ehí va entamar la so tramitación que Carcedo espera que seya a últimos de mes d'abril cuando llegue al Parlamentu.
"Una vez que zarremos l'acuerdu, el proyectu tien de sometese a información pública mientres quince díes, antes d'entamar la so tramitación interna nel Gobiernu y dempués va treslladase al Parlamentu calculo que nel "mes d'abril", esplicó la conseyera a la so llegada a la Universidá pa participar na Xornada de trabayu de los conseyos sociales de les universidaes españoles col Conseyu del Tribunal de Cuentes.
Carcedo recordó que l'acuerdu col PP inclúi, amás d'elevar el mínimu exentu hasta los 300.000 euros y meyorar la fiscalidá de la vivienda, la revisión de la tresmisión d'empreses y de donaciones.
La conseyera indicó que tán pendientes de zarrar cifres y una vez que se zarre será'l momentu de facer los cálculos pa saber l'impactu de los cambios nos ingresos de les arques rexonales.
