UVIÉU, 20 de Mayu (EUROPA PRESS)
Gonzali Producciones anunció esti xueves que va facer el doblaxe en llingua asturiana del llargumetraxe 'And Then There Were None', dirixíu en 1945 por René Clair, y protagonizáu por Walter Huston, Roland Young, Louis Hayward, June Duprez, Barry Fitzgeral, C. Aubrey Smith, Judith Anderson, Mischa Auer, Richard Haydn, Queenie Leonard y Harry Thurston.
Según esplica la productora nuna nota de prensa, ésta ye la adaptación cinematográfica primera, y abondo fiel, de la perconocida novela policiaca d'Agatha Christie 'Ten Little Niggers'. Presenta la historia de diez persones invitaes a pasar el fin de selmana nuna mansión na remota Isla del Negru. Toos recibieren la invitación del misteriosu señor Owen, al que naide nun conoz, pero que per mediu d'una grabación en discu va acusalos individualmente de ser responsables de crimes del pasáu. De magar esi momentu entama la sucesión d'asesinatos.
El versionáu, que n'asturianu va llamase 'Diez negrinos', tará fechu en parte por alumnos de la promoción primera de la Escuela de Doblaxe d'Asturies y va tar dirixíu por Illán Gonzali. Al mesmu tiempu, Gonzali Producciones tamién va doblar al castellanu esti títulu.
La productora ye responsable del doblaxe profesional n'asturianu dende'l 2010, con 16 trabayos realizaos hasta agora, ente los que destaquen 'Los viaxes de Gulliver' (2010), 'El tercer home' (2011), 'McLintock' (2011), 'La nueche de los muertos vivientes' (2012), 'El rostru impenetrable' (2013) o 'Harry el suciu' (2014); estos dos últimos emitíos delles veces pola Televisión del Principáu d'Asturies.
