MADRID, 21 de Xunu (EUROPA PRESS)
L'asturianu y l'aragonés cuerren peligru de desaspaecer nos próximos años, según analises d'espertos arrexuntaos por Google, qu'incluyó a ambes nun Proyectu de Llingües en Peligru d'Estinción qu'arrexunta información sobre más de 7.000 que tán a puntu de desapaecer en tol mundu. Tamién la llingua de signos catalana forma parte del catálogu.
Según esplicó nel so blogue oficial el buscador, la idea ye "crear una plataforma onde puea alcontrase y compartir la información más completa y reciente sobre los idiomes en peligru". N'España, incluyéronse tres llingües nesta iniciativa: l'aragonés, l'asturianu y la llingua de signos catalana, siendo'l primeru'l que s'alcuentra nuna situación más vulnerable.
Asina, Google alvierte de que nesti momentu l'aragonés fálenlu menos de 10.000 persones y, anque tovía hai adultos que lu usen, "pocos neños lu aprienden nel país". Menos riesgos de desapaecer cuerre l'asturianu, según el xigante de les busques estaounidense, con sobre 100.000 falantes nativos y e'apoyu de la comunidá, que se siente arguyosa d'utilizalu.
Na páxina del proyectu (www.endangeredlanguages.com) puen alcontrase vídeos con falantes nativos, tanto del aragonés como del asturianu, asina como información adicional arrexuntada de delles fontes sobre ambos llinguaxes.
En total, más de 7.000 llingües en tol mundu tán a puntu de desapaecer. Frente a esta realidá, l'ambiciosu oxetivu del proyectu ye "caltener y promover la cultura al traviés d'Internet" per mediu de la puesta en práctica de "un espaciu colaborativu onde cualquier va poder aportar les sos conocencies sobre les distintes llingües", y llograr asina "honrar les conocencies de los nuesos mayores y arriquecer el futuru de los mozos".
Un grupu diversu de collaboradores yá entamó a aportar conteníu que toma dende manuscritos del sieglu XVIII a ferramientes modernes pa la enseñanza d'idiomes como: vídeos, muestres d'idiomes n'audiu y artículos pa compartir conocimientos. Los miembros del Comité Asesor tamién aportaron directrices p'ayudar a entamar la plataforma y satisfacer los intereses y necesidaes de les comunidaes llingüístiques.
