MADRID, 26 de Febreru (EUROPA PRESS)
El ministru d'Economía, Luis de Guindos, avanzó que "con bastante probabilidá" el Conseyu de Ministros va aprobar mañana un real decretu llei de segunda oportunidá que, ente otres midíes, va dexar la dación en pagu y la reestructuración de la deuda pa colectivos especialmente vulnerables, a los que tampoco se-yos aplicarán les 'claúsulas suelu' nes hipoteques que-yos torguen beneficiase de les baxaes de los tipos d'interés.
En declaraciones a RNE recoyíes por Europa Press, De Guindos afirmó que pa ello ampliaráse'l Códigu de Bones Práctiques, que va incluyir una serie de midíes pa facilitar procesos de desapalancamientu del sector privao col fin d'aprovechar tola capacidá de xeneración de riqueza a futuru.
"Nel casu d'un entamador que tuviera qu'hipotecar la so casa pa financiar un negociu que nun foi bien, va permitise la liquidación total de la so deuda apurriendo los activos que tien disponibles, anque valgan menos que la deuda", esplicó'l ministru.
De Guindos indicó que cola Llei de segunda oportunidá preténdese que pequeños y medianos empresarios y entamadores que fracasaron nun proyectu empresarial nun queden estigmatizaos nin llastraos a futuru, de manera que les sos deudes non seyan una torga a l'actuación empresarial.
Con esti fin, va establecese un procedimientu "rápidu y áxil" pa eliminar diches deudes que llenden l'actividá de les pymes. Según De Guindos, los bancos, que son los principales acreedores, puen reconocer la realidá, porque yá provisionaron los creitos. "Eso va permitir qu'eses persones puean volver a l'actividá económica", afirmó.
