MADRID, 18 d'Avientu (EUROPA PRESS)
El Ministeriu d'Industria, Enerxía y Turismu convocó pa los próximos díes 22 y 23 d'avientu la puya estraordinaria p'asignar bloques adicionales del serviciu d'interrumpibilidá qu'ufierten los grandes consumidores d'eletricidá por amenorgar la so actividá cuando lo requiera'l sistema eléctricu.
Estes puyes xeneraron discutiniu dempués de que, tres la so celebración, el sector siderúrxicu espresara'l so malestar y Alcoa anunciara despidos y zarros de plantes. Industria respondió a les crítiques negando que les puyes tean rellacionaes col ERE d'Alcoa y anunciando la celebración de nueves puyes p'asignar hasta otros 200 millones d'interrumpibilidá pal 2015.
Nuna resolución publicada esti xueves nel BOE, Industria convoca la puya estraordinaria como complementu a la zarrada a últimos de payares, na que s'asignaron 238 bloques de 5 megavatios (MW) y nueve bloques de 90 MW.
El departamentu dirixíu por José Manuel Soria pidió'l 25 de payares un informe al operador del sistema sobre e la necesidá d'incorporar más bloques d'interrumpibilidá, y el 3 d'avientu pasáu Rede Eléctrica d'España (REE) enviólu, proponiendo la necesidá d'añadir potencia interrumpible adicional, según consta na resolución publicada nel BOE.
Na puya de la próxima selmana van subastase 50 bloques de 5 MW, colo que van añadise 250 MW d'interrumpibilidá. El preciu de salida de cada megavatiu ye de 195.000 euros, de cuenta que la puya toma como partida un valor de 48,7 millones d'euros.
El serviciu d'interrumpibilidá consiste nun pagu a los grandes consumidores de lluz en cuenta de detener la so actividá en momentos nos qu'exista saturación nel sistema eléctricu. El so costu pa la tarifa de la lluz, d'unos 750 millones añales, va quedar reducíu a unos 500 millones como parte de la reforma enerxética, de la que formen parte les ordes ministeriales recurríes.
P'asignar la interrumpibilidá, la reforma enerxética recueye la creación de les nueves subastes, nes que les empreses puyen por bloques de megavatios a un menor preciu eléctricu en cuenta d'ofrecese a retayar el so consumu si asina lo pide l'operador del sistema.
