UVIÉU, 13 Oct. (EUROPA PRESS) -
L'asociación Iniciativa pol Asturianu muestra'l so apoyu al Conceyu de Siero por usar l'asturianu na señalítica urbana. Una midida que, según la organización, "yá lleva años n'otros conceyos con total normalidá y que recibió l'ataque de Ciudadanos".
Al traviés d'una nota de prensa, Iniciativa recuerda a esti partíu que l'usu del asturianu ye una midida prevista pola llexislación y que-y da visibilidá al asturianu. "Amás, nun xenera nengún problema de comprensión, porque castellanu y asturianu son dos llingües cercanes y con un altísimu grau d'intercomprensión", señalen.
"Animamos a Ciudadanos Siero a sentir al so diputáu Nicanor García, qu'apoya'l desarrollu de la Llei d'Usu del asturianu y les midíes de normalización", recordó Iniciativa, qu'anima a Ciudadanos a sumase al "consensu" en favor del asturianu y que nun utilicen l'asturianu como elementu "pa facer política efectista y facese sentir nos medios".
"Les diferencies sobre la forma de normalizar l'asturianu son lexítimes, pero atacar al propiu idioma perxudica sobre manera a los falantes con menos conciencia llingüística, qu'en Siero son una parte importante de la población, y que precisen recibir mensaxes positivos sobre la so llingua propia, y non mensaxes de conflictu y refugu", sentencia Iniciativa.
